Жонни Депп «Кариб денгизи қароқчилари» фильмига қайтмоқда
Ноябрь ойи охирида The Sun нашри актёр Жонни Депп «Кариб денгизи қароқчилари» франшизасининг 6-қисмида яна капитан Жек читтак ролини ўйнаши ҳақида хабар берди. Гарчи 2022 йилнинг апрель ойида актёр унга гонорар сифатида 300 миллион доллар ва 1 миллион алпака таклиф қилинса ҳам, фильмининг давомида суратга тушмаслигини маълум қилганди. Франшизанинг янги қисми ҳақида нималар маълум? Жонни Депп ҳақиқатан ҳам бош ролда ўйнайдими?
Франшизанинг биринчи қисми деярли 20 йил олдин, 2003 йилда чиқарилган. «Кариб денгизи қароқчилари: Қора марварид тавқи лаънати» фильми Диснейленддаги мавзули аттракционга ҳам асос бўлганди. Премьерадан олдин журналистлар фильм муваффақиятсиз бўлишини кутишган, чунки ўша вақтга қадар бу жанр кўп йиллар давомида муваффақият қозонмаган эди.
Аммо кутилганидан фарқли ўлароқ, фильм ажойиб муваффақиятга эришди, кўплаб мукофотларга сазовор бўлди, унинг касса даромадлари 650 миллион доллардан ошди (2003 йилдаги 4-ўринни эгаллаган фильм) ва танқидчилар ҳам ижобий шарҳларни қолдирдилар.
Танқидчилар ва томошабинлар бош роллардан бири — капитан Жек читтакни ўйнаган Жонни Деппнинг зукко ва ноёб ижросини юқори баҳолашди. Шарҳловчилардан бири шундай деб ёзган эди: «Кариб денгизи қароқчилари Жонни Деппга тегишли. Агар Депп иштирок этмаса, ўртамиёна ва зерикарли фильм чиқади».
Жонни Депп «Энг яхши эркак роли» номинацияларида бир нечта мукофотларга сазовор бўлди. Депп томонидан ижро этилган капитан Жек читтак образи шу қадар таниқли ва машҳур бўлдики, у актёр карьерасидаги ўзига хос рол бўлиб қолди.
Картинанинг муваффақияти Walt Disney Pictures’ни трилогия яратишга ундади. Фильмнинг ян иккита давоми суратга олинди: «Кариб денгизи қароқчилари: мурдалар сандиғи» (2006) ва «Кариб денгизи қароқчилари: дунёлар чегарасида» (2007). Трилогиянинг жами даромади 2,5 миллиард доллардан ортиқни ташкил этди.
Бундай катта даромад ва машҳурлик «Қароқчилар»нинг яна 2 қисмини суратга олишдан бошқа йўл қолдирмади: 2011 йилда «Номаълум соҳилларда» деб номланган 4-қисм, 2017 йилда 5-қисм — «Мурдалар эртак айтмайди» Умуман олганда, франшиза бутун дунё бўйлаб 4,5 миллиард доллардан ортиқ даромад келтирди.
4-қисм чиқишидан бироз олдин Disney 5 ва 6-фильмларни кетма-кет суратга олишни режалаштираётгани ҳақида хабар берилган эди, гарчи якунда фақат 5-қисми чиққан эди. Тўғри, режиссёр Йоахим Реннинг 2017 йилда «Мурдалар эртак айтмайди» фильми саргузаштнинг фақат бошланиши эканлигини таъкидлаб, давоми албатта бўлишини тасдиқлади.
Аммо 2018 йилда Disney франшизага «янги энергия» олиб келмоқчи эканлигини айтиб, Депп билан ҳамкорликни тўхтатди. Фильм раҳбарлари ҳатто «Қароқчилар» фильмининг сценарийсини ёзиш учун «Дедпул» муаллифларини ёллашди. 2 йил ўтгач эса Disney Деппнинг кейинги фильмда ҳатто эпизодик ролини ўйнаш ғоясини кўриб чиқишни ҳам рад этди.
Мухлислар бу янгиликни ғазаб билан қабул қилишди, чунки «Кариб денгизи қароқчилари»ни Жек читтакциз тасаввур қилиш қийин. Бу образ фильмларда марказий ўринни эгаллайди. Мухлислар ҳатто 6-қисмга ҳам актёрни қайтаришни талаб қилган петицияни ҳам тузишди. Мурожаат муаллифлари студия раҳбариятига мурожаат қилиб, «Фильмда Депп бўлмаса, ҳеч ким бу фильм билан қизиқмайди», деб ёзишган.
Яқинда The Sun нашри 2023 йилнинг февраль ойида Буюк Британияда франшизанинг 6-қисмини суратга олиш бошланиши ҳақида хабар берди — бош ролни яна Жонни Депп ўйнайди. Қайд этилишича, 2023 йил охирида 59 ёшли актёр синов тариқасидаги суратга олишда иштирок этиши керак. Фильм сюжети ҳақида ҳали кўп нарса маълум эмас. Продюсер Жерри Брюкхаймернинг сўзларига кўра, сценарий устида иш олиб борилмоқда.
Манбага кўра, ҳаммаси дастлабки босқичда, ҳозирча лойиҳага бириктирилган режиссёр ҳам йўқ. Янги фильмнинг ишчи номи — «Денгиздаги кун». Дастлабки 3 та фильмда ишлаган Брюс Хендрикс янги лойиҳада ижрочи продюсер этиб тайинланди, аммо бошқа тафсилотлар сир сақланмоқда. Умуман олганда, Disney имкон қадар фильм ҳақидаги ҳамма нарсани яширмоқчи.
Эслатиб ўтамиз, актёрнинг атрофидагилар The Sun бу хабарни эълон қилган куннинг ўзидаёқ Деппнинг «Кариб денгиз қароқчилари» фильмининг янги қисмида иштирок этиши ҳақидаги миш-мишларни рад этди. Аммо лойиҳанинг дастлабки босқичи, унинг махфийлиги, шунингдек, томошабинларнинг Жонни Депп ижро этган персонажга бўлган меҳрини инобатга олсак, миш-мишлар тез орада расмийлар томонидан тасдиқланишига ишониш учун асос бор. Ахир, шамол бўлмаса дарахтнинг учи қимирламайди.