Хорватияда Алишер Усмоновнинг «музлатилган» яхтаси сирли равишда ғойиб бўлди: расмийлар нима демоқда? — Бизга қўшилинг: ???? https://t.me/joinchat/AAAAADwt0NGCRoONT4f1_Q
Фото: 24УР Россиялик олигарх Алишер Усмоновга тегишли Ирина ВУ яхтаси Хорватия ҳудудини санкцияларга қарамай бемалол тарк этгани аниқланди. Бу ҳақда маҳаллий Jutarnji нашри хабар берди. Маълум қилинишича, яхта Россиянинг мусодара қилинган мулклари рўйхатига киритилган. Шу сабабли яхтанинг ҳаракатланиши юзасидан мунозара келиб чиққан. Хорватия расмийлари Ирина ВУ Муртер оролидаги Бетина маринасининг тўхташ жойини уч ой олдин тарк этганини аниқлаган. 2022 йил 6 октябрда яхта Бетинани тарк этганини очиқ манбалардан билиб олиш мумкин. 9 октябрь куни у Туркиянинг Дидим портига етиб келган ва у ерда лангар қолдирган. Бу яхтанинг охирги манзили экани айтилмоқда. Яқин кунларда Ирина ВУ билан деярли бир хил кема Бетинага сузиб келган. Журналистларнинг манбасига кўра, бу Алишер Усмонов яхтасининг Хорватияда эканига ишора қилиш учун амалга оширилган. Бироқ расмийлар буни тасодиф деб атамоқда. ОАВ хабарларига кўра, Ирина ВУни олиб кетишга муваффақ бўлинган, чунки Хорватия чегара полициясида кеманинг ҳаракатланиши тақиқлангани ҳақида маълумот бўлмаган. Денгиз, транспорт ва инфратузилма вазирлиги штат котиби Ален Госпочичнинг айтишича, Усмонов санкцияларга учраганида яхта муҳрланган. Порт капитани унга киришни тақиқлаган ва эгалари яхта мусодара қилинишидан огоҳлантирилган. Бироқ Бетина бепул кириш ҳуқуқига эга очиқ марина, шу учун порт хавфсизлиги таъминланмаган. «Вазирлик портга яхта ҳибсга олингани ҳақида хабар берган, порт капитани ҳукуматга яхтага ҳар қандай тарзда кириш тақиқлангани бўйича тегишли кўрсатма берган. Вазирлик эса портдаги мулкларни кеча-ю кундуз қўриқлаш учун хавфсизлик хизматларини ёлламайди ва буни режалаштирмайди, чунки бундай тизим ҳаётий эмас», — дейди Госпочич. Давлат котиби нима учун яхта жойидан қўзғалгани уч ойдан кейин аниқланганига ҳам жавоб берган. Унга кўра, вазирлик вазифаларига «музлатилган» мулкни текшириш кирмайди. Хорватия хавфсизлик хизматлари халқаро терговчилар билан ҳамкорликда шов-шувли воқеани текширишга киришди.