Маҳаллий матбуот собиқ депутат Кушербаевнинг вазир маслаҳатчиси лавозимига тайинлангани ҳақида ёзмоқда
Ўзбекистон Олий Мажлиси Қонунчилик палатасининг собиқ депутати Расул Кушербаев 1 февраль куни Табиат ресурслари вазирининг маслаҳатчиси этиб тайинланган. Бу ҳақда Kun.uz нашри ўз манбаларидан олинган маълумотга таянган ҳолда хабар қилди.
Яқинда ташкил этилган Табиат ресурслари вазирлигига аввал Туризм ва маданий мерос вазири лавозимида ишлаган Азиз Абдуҳакимов раҳбарлик қилмоқда.
Қуйи палатадаги депутатлар орасида энг кўзга кўрингани бўлган Расул Кушербаев дарахтларнинг ноқонуний кесилиши, ўринсиз “снос”лар, монополист ташкилотларнинг бошбошдоқлиги дохил қатор ижтимоий масалалар бўйича кўплаб чиқишлари билан танилган.
Кушербаев ўтган йилнинг 23 декабрида депутатликдан истеъфо бергани ҳақида Озодлик аввалроқ хабар қилган. Ўшанда у Қонунчилик палатасининг давлат бюджети лойиҳаси муҳокамага қўйилган сессиясида ўзига сўз берилмаганига норозилик белгиси сифатида шундай қарорга келганини айтган эди.
Расул Кушербаевнинг депутатлик мандатини топшириши мустақил Ўзбекистон парламенти тарихида иккинчи шов-шувли истеъфо бўлган. Илк истеъфо 1992 йилнинг 2 июлида “Эрк” демократик партияси лидери Муҳаммад Солиҳ томонидан берилган эди. Муҳаммад Солиҳ ўша пайтда ўз истеъфосини “мухолифатга қарши бошланган сиёсий репрессияларга норозилик” ифодаси дея изоҳлаганди.