Қирғизистоннинг амалдаги ва собиқ президентлари учрашуви ўтказилди
Қирғизистоннинг собиқ президентлари Асқар Ақаев, Қурмонбек Бакиев, Рўза Ўтунбаева, Алмазбек Атамбаев, Сўўрўнбек Жээнбеков ва амалдаги президент Садир Жапаров “бетараф ҳудудда” учрашув ўтказди. Бу ҳақда Садир Жапаров ўзининг Фейсбук саҳифасида маълум қилди.
Унга кўра, учрашув “Қирғизистон халқнинг якдиллигини ва бирдамлигини мустаҳкамлаш” мақсадида ўтказилган. Учрашув давомида “президентлар бир-бирларини кечирганлари”ни айтганлар.
Озодлик радиоси қирғиз хизматининг ишончли манбаларга таяниб хабар беришича, учрашув Дубайда бўлиб ўтган.
Баъзи қирғизистонликлар Жапаровнинг бу ҳаракатини қўллаган бўлса, бошқалар бу ишни танқид қилиб, қонун устиворлиги бўлиши кераклигини айтмоқда.
Учрашувда иштирок этганини тасдиқлаган собиқ президент Алмазбек Атамбаев эса Фейсбук саҳифасида: “Мамлакатда тинчлик ва бирдамлик ўрнатиш билан Бакиевни Қирғизистонга келишига рухсат бериш бошқа-бошқа нарса. Ўртада қон тўкилган. Буни унутиш керак эмас. Президент Садир Жапаров мени эшитди ва тўғри хулоса чиқаради, деган умиддаман”, деб ёзди.
Президент Жапаров маъмурияти мазкур билдирувга ҳозирча муносабат билдирмади.
Қирғизистон мустақилликни қўлга киритганидан буён мамлакатни олтинчи президент бошқармоқда.
Тўнғич президент Асқар Ақаев 2005 йил 24 мартда юз берган “Лола инқилоби” ортидан Россияга қочган эди. Шу йил январь ойи охирида унга нисбатан қўзғатилган жиноий ишлар қисқартирилгани маълум бўлган.
2005 йилда ҳокимиятга келган Қурмонбек Бакиев 2010 йилдаги апрель инқилоби ортидан Беларусга қочган. Апрель воқеалари пайтида 87 киши ҳалок бўлган. Қурмонбек Бакиев сиртдан судланиб, 30 йилга озодликдан маҳрум қилинган.
Учинчи президент Роза Ўтунбаева 2010-2011 йилларда Муваққат ҳукуматни бошқарган. 2011 йилнинг 1 декабрида Алмазбеек Атамбаев президентлик курсисига ўтирди.
2017 йилдаги сайловда Алмазбек Атамбаевнинг дастаги билан президентликка Сўўрўнбай Жээнбеков келди. У 2020 йил октябридаги норозилик намойишлари оқибатида истеъфо берган эди. Шундан сўнг Садир Жапаров президентликка сайланган.