Эронда ҳижобсиз аёллар “ақлли камералар” воситасида кузатилмоқда
Эрон расмийлари жамоат жойларида кузатув камераларини ўрната бошлади. Бу ҳақда Reuters агентлиги хабар қилди.
Эрон полициясига кўра, бу чора “ҳижоб кийиб юриш тўғрисидаги қонунга қаршилик қилиш”нинг олдини олиши лозим. “Ақлли камералар” ҳижобсиз юрган ёки рўмолини рисоладагидек ўрамаган аёлларни кузатиб туради.
Полиция баёнотида рўмолини нотўғри ўрагани туфайли камерага тушиб қолган аёлларга “огоҳлантирувчи хабарлар” йўлланиши қайд этилган. Бу огоҳлантирув ортидан жарима солинадими-йўқми – бу ҳақда баёнотда ҳеч нима дейилмаган.
Эронда ҳокимият тепасига радикал диндорлар келган 1979 йилдан буён аёлларга ҳижобда юриш мажбурий қилиб қўйилган. Ҳижобсиз юрган ёки рўмолини нотўғри ўраган аёллар жаримага тортилади ёки ҳибсга олинади. Кўчада рўмолини рисоладагидек ўрамаган аёлларга ҳужум қилиниши тез-тез учраб туради.
Ўтган йилнинг сентябрь ойида ҳижобини нотўғри ўраганлик айблови билан Эрон полицияси 22 ёшли Маҳса Аминийни қўлга олган эди. Ўшанда қиз полиция участкасидан касалхонага олиб кетилган, бир неча кундан кейин эса жон берган. Аминийнинг яқинлари унинг ўлимига куч ишлатар тузилмалар ходимлари томонидан калтакланиш сабаб бўлган, деб ҳисоблашади.
Шундан сўнг Эрон кўчаларида норозилик намойишлари бошланган. Одамлар полиция зўравонлиги, Эрон расмийларининг ўзгача фикрлиларга қарши курашига норозилик билдириб, мамлакатнинг демократиклашуви ва оятуллоҳ Али Хоманаийнинг ҳокимиятдан кетишини талаб қилиб чиқишган.
Норозилик чиқишлари шафқатсизлик билан бостирилган. Ҳуқуқ фаолларига кўра, оммавий намйоишлар чоғида 600 дан зиёд норози ўлдирилган, 20 мингга яқин одам ҳибсга олинган. Бунинг ортидан бир неча киши қатл этилган.