Самарқандда 60 ёшли эркак 70 ёшли поччасини пичоқлади
Самарқанд вилояти Нарпай туманида 70 ёшли отахон қайнукаси томонидан пичоқланди. Бу ҳақда Ички ишлар вазирлиги ахборот хизмати хабар берди.
Хабарга кўра, 70 ёшли отахон аёли билан келишолмай қолгани сабабли 60 ёшли қайнукаси томонидан пичоқланган. Айбланувчи эса буни содир этган вақтда спиртли ичимлик таъсирида бўлганини айтган.
“Аёлим билан тортишиб қолдик, аёлим укасига қўнғироқ қилган. Кейин у келиб қолди, қорнимга пичоқ тиқиб олди. Қисқа вақт ичида бўлди. Қизим билан куёвим қайнимни ушлаб қолди”, — дейди жабрланувчи.
Нарпай тумани жиноят ишлари бўйича суди биносида мазкур иш кўриб чиқилди. Судланувчи Жиноят кодексининг 105-моддаси 2-қисмида назарда тутилган жиноятни содир этганликда айбли деб топилиб, унга нисбатан 1 йил 6 ой муддатга озодликни чеклаш жазоси тайинланди.