Ироқ қамоқхонасидаги ўзбекистонлик маҳкума аёллар Шавкат Мирзиёевга мурожаат йўллади
Ироқдаги “Росафа” қамоқхонасидан 44 нафар ўзбекистонлик маҳкума аёл Шавкат Мирзиёевга мурожаат қилгани акс этган видео тарқалди. Бош прокуратура мазкур видеомурожаатга изоҳ берди.
Олинган маълумотларга кўра, “Росафа” қамоқхонасида сақланаётган ўзбекистонлик маҳкума аёллар ИШИД террористик ташкилотининг аъзолари ҳисобланиб, Сурия ва Ироқ давлати ҳудудида ушбу террористик ташкилот сафида фаолият юритиб келган. Улар 2017-йилда Ироқ ҳукумати томонидан қўлга олиниб, 4 нафари умрбод ва қолганлари 15 йилдан 20 йилгача озодликдан маҳрум қилинган.
Ушбу қамоқхонадаги шароитлар қониқарли бўлмагани сабабли 2019-йил Ироқ ҳукумати билан келишувга асосан аёлларнинг 64 нафар фарзандлари Ўзбекистонга олиб келиниб, қариндошлари қарамоғига ва меҳрибонлик уйларига топширилган. Мазкур маҳкума аёлларнинг жазо муддатлари ниҳоясига етгач, халқаро ҳуқуқ нормаларига асосан уларни Ўзбекистонга қайтариш чоралари кўрилади.