«Россия электроника бўйича Ғарб санкцияларини четлаб ўтишда яхшиланяпти»
Ғарбнинг Россияга уруш машинасини ёнилғи билан таъминлаш учун зарур бўлган асосий микрочиплар ва электроникалар бўйича экспорти урушдан олдинги даражага қайтди.
Бу ҳақда АҚШнинг юқори лавозимли расмийси маълум қилди. Унинг фикрича, Россия Ғарб томонидан эълон қилинган санкцияларни четлаб ўтишга қаратилган сай-ҳаракатларни сезиларли даражада кучайтирган.
«Жорий йилнинг бошига келиб, Россия электрониканинг айрим асосий тоифаларини, жумладан, замонавий қуролларни яратиш учун чиплар, процессорлар ва интеграл микросхемаларни тахминан урушгача бўлган даражада қайта импорт қила олди», — дейди АҚШ Давлат департаментининг санкциялар бўйича координатори Жим О’Брайен Стокгольмда бўлиб ўтган ECFR тадбирида POLITICO нашри мухбирига берган интервьюсида.
Координаторнинг қўшимча қилишича, Европа компаниялари электроникаларни тўғридан-тўғри Россияга сотаётгани йўқ. Улар мазкур материалларни Россияга қайта сотадиган бошқа мамлакатларга экспорт қиляпти.
О’Брайеннинг таъкидлашича, санкцияларнинг четлаб ўтилиши муҳим муаммога айланган, Қўшма Штатлар эса мазкур муаммолар билан боғлиқ бешта мамлакатни аниқлаган. Туркия, Қозоғистон, Арманистон, Грузия ва Араб Амирликлари шулар жумласидан.
«Айни пайтда Европа Иттифоқи Россияга қарши 11-санкциялар пакети устида ишлаяпти, бу пакет Россия билан бизнес муносабатларини сақлаб қолган ва унга санкцияларни четлаб ўтиш имконини бераётган мамлакатларга нисбатан мисли кўрилмаган қатъий чораларни ўз ичига олиши мумкин», — дея қўшимча қилди координатор.