Жо Байден Си Цзиньпинни диктатор деб атади
АҚШ президенти Жо Байден Хитой лидери Си Цзиньпинни диктатор деб атади. Бу ҳақда Байден, Reuters хабарига кўра, Қўшма Штатлар осмони узра йил бошида уриб туширилган Хитой разведка зонди юзасидан ўз муносабатини билдираётган пайтда айтган.
Калифорнияда ўтказилган ўз сайлов кампанияси учун маблағ йиғиш бўйича тадбирда чиқиш қилган Байден: “Мен ичида икки вагон жосуслик жиҳозлари бўлган ҳаво шарини уриб туширганимда Си Цзиньпиннинг ўта норози бўлгани сабаби унинг мазкур шар ҳақида билмаслиги бўлган. Диктаторларга эса чор-атрофда нима бўлаётганини билмаслик унча ҳам ёқавермайди”, деган.
Байден бу гапни АҚШ давлат котиби Энтони Блинкеннинг Хитойга сафари якунланганидан бор-йўғи бир кун ўтиб айтган.
Блинкен сафари, урғуланишича, айни кунда анча совуқ бўлган икки томонлама муносабатларни яхшилашга қаратилган эди. АҚШ давлат котиби 19 июнь куни Пекинда Си Цзиньпин билан музокаралар ўтказгани ҳақида Озодлик аввалроқ хабар қилган эди.
Учрашув якунлари бўйича матбуот анжуманида Блинкен Қўшма Штатлар ва Хитой икки томонлама алоқаларни барқарорлаштириш зарурлиги юзасидан якдил эканини қайд этган. Шу билан бирга, АҚШ вакилига кўра, Вашингтон ва Пекин ўртасида бир қатор масалалар бўйича теран ихтилофлар ҳали ҳам мавжуд. Мулозим бунга оид тафсилотларга тўхталган эмас.
Блинкеннинг Пекинга ташрифи февраль ойига режаланган эди, бироқ АҚШ ўз ҳаво ҳудудида Хитой аэростатини уриб туширгани ортидан кейинга қолдирилган. Ўша пайтда Вашингтон аппарат разведка ишлари билан шуғулланганини билдирган. Хитой расмийлари эса бунга жавобан аппаратнинг ўз йўналишидан оғиб, бошқа ёққа учиб кетган метеозонд эканини айтишган.