“Райффайзенбанк” Ўзбекистонга еврода пул жўнатмаларини тўхтатди
Австриянинг Raiffeisen Bank International (RBI) гуруҳининг Россиядиги шўба корхонаси —“Райффайзенбанк” Ўзбекистонга ва бошқа қатор давлатларга еврода пул жўнатмалари тўхтатилганини маълум қилди.
Банк матбуот хизматининг билдиришича, 3 июлдан жисмоний шахсларга ҳам, юридик шахсларга ҳам Россия, Озарбайжон, Арманистон, Беларус, Грузия, Иордания, Қозоғистон, Қирғизистон, Молдова, БАА, Тожикистон, Туркманистон, Ўзбекистонга еврода пул жўнатиш тўхтатилади.
Айни пайтда мазкур банк орқали юқорида айтиб ўтилган мамлакатларга евродан бошқа валюталарда пул ўтказиш мумкин бўлади. Шу билан бир қаторда “Райффайзенбанк”нинг Россиядаги мижозлари ўзининг банкдаги бир ҳисобидан иккинчи ҳисобига евро ўтказишига тўсқинлик қилинмайди.
Reuters агентлигининг хабар беришича, Европа Марказий банки Австриянинг Raiffeisen Bank International гуруҳидан россияни тарк этишни талаб қилмоқда. Гуруҳ бир неча ойлардан бери “Райффайзенбанк”ни сотиш учун харидор қидирмоқда, аммо бу уринишлар муваффақиятсиз якунланмоқда. Raiffeisen Bank International май ойида “Райффайзенбанк”ни ўз акциядорларига ўтказиб бериши мумкинлигини билдирган.