Африканинг икки қитъага ажралиб кетиши мумкинлиги башорат қилинмоқда
Африка йилига тахминан 6,35 миллиметрга кенгаяётган бир неча ёриқлар бўйлаб аста-секин ажралиб бормоқда.
Бу ҳақда Санта-Барбарадаги Калифорния университети олимлари маълум қилишди. Уларнинг бу фикрини Лондон геология жамияти олимлари қўллаб-қувватлади.
Америкалик тадқиқотчиларнинг фикрича, иссиқ ҳароратнинг сайёрамиз юқори мантиясидан ер юзасига, ер қобиғига чиқиб бориши бунга асосий сабаб бўлмоқда. Шу боис, қитъада вулқон фаоллиги кучайган ва Килиманжаро пайдо бўлган.
Ўз навбатида, Лондон геология жамияти вакиллари бу жараён аллақачон узунлиги тахминан 3,5 минг километрга чўзилган водийлар тармоғининг шаклланишига олиб келганини айтди, деб хабар беради mir24.tv.
Геологларнинг башорат қилишича, материкнинг шарқий қисми ажралса, ёриқ жойида денгиз пайдо бўлиши мумкин. Бир қатор тадқиқотчиларнинг фикрича, агар Африка уни бўлинишига олиб келувчи табиий кучлар жуда секин ҳаракатланса ва плиталарни ажрата олмаса, қитъа яхлитлигини сақлаб қолиши мумкин.