АҚШ қора рўйхатига тушган 2та ўзбек компанияси ЕИ санкцияларига ҳам учради
Европа Иттифоқи Ўзбекистонда рўйхатдан ўтган Alfa Beta Creative ва GFK Logistic Asia МЧЖни санкциялар рўйхатига киритди. Бир манзилда жойлашган бу икки компания Россия ҳарбий саноатини қўллаб-қувватлаганликда гумонланмоқда.
23 июнь куни, Европа Иттифоқи Россияга қарши санкцияларнинг 11-пакетини қабул қилди.
ЕИ санкциялар рўйхатига Россия ҳарбий саноатини қўллаб-қувватлаганликда гумон қилинган яна 87та компания ва ташкилот қўшилди. Янгиланган рўйхатга Россия ва Эрон корхоналаридан ташқари, Хитой, Ўзбекистон, БАА, Сурия ва Арманистонда рўйхатдан ўтган компаниялар ҳам киритилган.
Хусусан, Евроиттифоқ қора рўйхатида Ўзбекистондан Alfa Beta Creative ва GFK Logistic Asia компаниялари жой олган. Улар санкцияларни четлаб ўтган ҳолда Россия мудофаа саноати эҳтиёжлари учун маҳсулот сотиб олишга уринганликда айбланмоқда.
Аввалроқ, АҚШ ҳукумати ҳам мазкур икки компанияга нисбатан санкция қўллаганди.
Корхона ва ташкилотларнинг ягона реестрига кўра, бу икки МЧЖ бир манзилда – Тошкент шаҳри Шайхонтоҳур тумани Навоий кўчаси 16А-уйда жойлашган.
Alfa Beta Creative 2022 йил 6 июнда рўйхатга олинган. Устав капитали – 2 млн сўм. Асосий фаолият йўналиши – “бошқа турдаги офис техникалари ва ускуналарининг улгуржи савдоси”. Таъсисчиси – Светлана Каримовна Ҳайдари.
GFK Logistic Asia 2018 йил 28 мартда рўйхатдан ўтказилган. Устав капитали – 200 млн сўм. Асосий фаолият йўналиши – “қуруқлик транспорти соҳасидаги хизматлар”. Таъсисчилари – GFK Logistic Asia (80 фоиз) ва Грабилин Олeг Валeриевич (20 фоиз).
Маълумот учун, ўтган йилнинг июнь ойида АҚШ Давлат департаменти томонидан 100 фоиз улуши Олег Грабилинга тегишли бўлган Promcomplektlogistic корхонасига ҳам чекловлар жорий қилганди.