Ўзбекистоннинг U-17 терма жамоаси Осиё кубоги ярим финалида кореялик тенгдошларига мағлуб бўлди
Таиланд пойтахти Бангкокдаги “Патум Тани” стадионида 29 июнь оқшомида бўлиб ўтган Осиё кубоги ярим финал ўйинида Ўзбекистоннинг U-17 терма жамоаси Жанубий Корея термасига 0:1 ҳисобида ютқазиб қўйди. Ўйиндаги ягона голни Вак Ин Ву киритди.
Мусобақа чорак финалида ўзбекистонлик ёш футболчилар Саудия Арабистонидан бўлган тенгдошларини 2:0 ҳисобида мағлуб қилган, кечаги ўйиндаги ғалаба эса уларга финалга йўлланма берар мумкин эди. Бунгача бўлган ўйинларда ўзбек футболчилари Япония қарши 1:1 ҳисобида тугатган, Ҳиндистон ва Вьетнам командаларини эса 1:0 ҳисобида ютган эди.
Бошқа бир ярим финал ўйинида Япония термаси Эрон командасини мағлубиятга учратган. Шу тариқа 2 июль кунига бўлиб ўтажак финалда Япония ва Жанубий Корея термалари беллашади. Учинчи ўрин учун ўйин ўтказиш кўзда тутилмаган, бронза медаллари финалга чиқолмаган Ўзбекистон ва Эрон командаларига берилади.
Ярим финалга чиқиш Ўзбекистон терма жамоасига шу йилнинг 10 ноябридан 2 декабригача Индонезияда ёш футболчилар ўртасида ўтказиладиган жаҳон чемпионатида иштирок этиш учун йўлланма берган.
Таиландда бўлиб ўтаётган 17 ёшгача бўлган футболчилар ўртасидаги Осиё кубоги 15 июнда бошланган бўлиб, шу ҳафта охирида - 2 июль куни ниҳоясига етади. Мусобақаларда Ўзбекистон терма жамоаси дохил 16 та команда иштирок этди.