Венгрия парламенти Швециянинг НАТОга кириши ҳужжатини тасдиқлайдими?
Венгрия парламентида 31 июль куни навбатдан ташқари ўтказиладган йиғилишда мухолифатчи депутатлар Швециянинг НАТОга кириши масаласини кун тартибига киритиш бўйича таклиф билдиришди. “HVG” интернет нашри хабар беришича, айни масала бўйича овоз бериш ўтказилмайди, чунки ҳукмрон Венгрия фуқаролик иттифоқи партияси кун тартибини тасдиқлашдан бош тортди.
Хабарда ёзилишича, ташаббус 49 мухолиф депутат томонидан илгари сурилгани боис, “парламент спикери Ласло Кёвернинг навбатдан ташқари йиғилиш чақиришдан бошқа чораси қолмаган”. Зеро, мавжуд қонунга кўра, бунинг учун 40 депутат етарли эди.
Кичик ҳамкорлар – Христиан демократлар ва парламентдаги 199 ўриндан 135 тасини эгаллаган етакчи партия Швециянинг НАТОга қўшилиши масаласини кузда кўриб чиқмоқчи.
“Ҳукмрон фракция 31 июль кунига белгиланган навбатдан ташқари сессияни бойкот қилади ва овоз беришда қатнашмайди”, деб ёзган нашр. 25 сентябрдан кейин, яъни ёзги таътил тугагач, парламент тўлиқ иш бошлайди.