Хитой ва Мўғулистонда ўлат аниқланди
Хитой ва Мўғулистонда 14 август куни 3 тадан бубонли ўлат касаллиги аниқланди. Санэпидқўмита бу борада Ўзбекистондаги вазият ҳақида хабар қилди.
Маълумотга кўра, 14 августда Хитой ва Мўғулистонда 3 тадан бубонли ўлат касаллиги аниқланди. Ўлат энг даҳшатли касалликлардан бири ҳисобланиб, бутун инсоният тарихида юз берган учта ўлат пандемияси юзлаб миллион одамлар ҳаётига зомин бўлган. Ўлат – табиий ўчоқли зооноз касалликлар гуруҳига мансуб инфекция бўлиб, ўта хавфли юқумли касаллик ҳисобланади. Ўлат одатда табиий ўчоқдаги касаллик микробини юқтириб олган кемирувчилар орасида тарқалади.
Касал кемирувчидан касаллик микроби соғлом кемирувчига бургалар ва каналар чақиши орқали юқади. Касалликнинг ёввойи ҳайвонлар орасида кенг тарқалиши эпизоотия жараёни деб аталади. Эпизоотия кечаётган ҳудудларда мунтазам яшайдиган маҳаллий аҳоли ёки мавсумий ишлайдиган одамларга касаллик бурга ва каналар чақиши орқали юқади. Бунда асосан ўлатнинг бубонли шакли (бубон – ўлат микроби зарарлаган ва шишган лимфа тугуни) кузатилади. Бубон шаклидаги ўлат ҳозирда 95-98 фоизни ташкил қилади.
Таъкидланишича, касаллик вақтида аниқланиб, замонавий даволаш чоралари ўз вақтида ўтказилганда деярли барча ҳолларда касалланганлар тузалиб кетади. Агар ўлат микроби ҳаво орқали юқса, ўпка шакли, оғиздан юқса, ошқозон-ичак шаклида кечади. Шаклидан қатъи назар, касаллик вақтида даволанмаган беморларда микробнинг қонда кўпайиши орқали сепсис шаклида оғир кечиб, ўлимга сабаб бўлади.
Касаллик оғир интоксикация синдроми, иситма, терининг, лимфа тугунларининг, ўпканинг шикастланиши, септик ҳолат билан тавсифланади.
Ўзбекистонда мавжуд табиий ўчоқларда эпизоотияларни вақтида аниқлаб, уларнинг эпидемияга айланиб кетмаслигининг олдини олиш билан мунтазам тизимли равишда шуғулланадиган ўлатга қарши тизим муассасалари мавжуд бўлиб, улар ўчоқлар фаоллашган пайтларда керакли профилактик тадбирларни олиб боради.
Касаллик ҳаво йўллари ва қуруқликдаги йўллар орқали чет эллардан кириб келишининг олдини олиш мақсадида 50 дан ортиқ чегара кесиб ўтиш жойларида кеча-ю кундуз фаолиятдаги санитария-карантин пунктлари ташкил этилган.
“Юқоридагиларни ҳисобга олиб, бизда ҳеч қандай хавотирга ўрин йўқ”, — дейилади хабарда.