Путин Пригожиннинг дафн маросимида қатнашмайди
Владимир Путин “Вагнер” хусусий ҳарбий кампанияси раҳбари Евгений Пригожиннинг дафн маросимига бормайди.
“Президентнинг (маросимда) иштирок этиши кўзда тутилмаган”, — деди Россия президентининг матбуот котиби Дмитрий Песков 29 август куни журналистлар билан бўлиб ўтган брифингда.
Песков, шунингдек, Кремлда Пригожиннинг дафн маросими ҳақида аниқ маълумотлар йўқлигини таъкидлади.
“Бироқ бу масала бўйича қарорни (Пригожиннинг) қариндошлари ва дўстлари қабул қилади. Бу ерда уларсиз ҳеч нарса деёлмаймиз”, — деди Песков.
Россия Тергов қўмитаси Пригожиннинг ўлимини тасдиқлади
23 август куни Тверь вилоятида Евгений Пригожинга тегишли хусусий бизнес-жет ҳалокатга учради. Оқибатда ўн киши ҳалок бўлди: етти нафар йўловчи ва уч экипаж аъзоси. Федерал ҳаво транспорти агентлигининг маълум қилишича, бортда бошқалар қаторида “Вагнер” раҳбари Пригожин, ХҲК командири Дмитрий Уткин ҳам бўлган. 27 август куни Россия Тергов қўмитаси молекуляр-генетик экспертиза асосида авиаҳалокат қурбонларининг шахси аниқлангани ва улар орасида “Вагнер” раҳбари ҳам борлигини маълум қилди.
“Фонтанка” хабар беришича, Евгений Пригожиннинг дафн маросими 29 август куни бўлиб ўтиши мумкин. Нашрнинг ёзишича, Санкт-Петербургдаги Серафимовский қабристонига металл детекторлари ўрнатилган, бу Пригожиннинг дафн маросимига тайёргарлик билан боғлиқ бўлиши мумкин.
Пригожин ва Тверь вилоятидаги ҳалокат қурбонлари қаерда ва қачон дафн этилиши ҳақида ҳозирча расмий маълумот йўқ.