Ўзбекистонда тиббий суғурта 2026 йил охиригача тўлиқ жорий этилади — Бизга қўшилинг: ???? https://t.me/joinchat/AAAAADwt0NGCRoONT4f1_Q
Ўзбекистон бўйлаб тиббий суғуртани 2026 йилнинг якунигача тўлиқ жорий этиш режалаштирилмоқда. Бу ҳақда Соғлиқни сақлаш вазирлиги фаолиятини янада такомиллаштириш чора-тадбирлари тўғрисида”ги президент фармонида келтирилган.
Унда белгиланишича, соғлиқни сақлаш вазири ва Давлат тиббий суғуртаси жамғармаси ижрочи директори 2026 йилнинг якунига қадар тиббий суғуртанинг республика бўйлаб тўлиқ жорий этилиши учун шахсан жавобгар ҳисобланади.
Фармонга кўра, 2024 йил 1 январдан Давлат тиббий суғурта жамғармаси юридик шахс мақоми ҳамда улар фаолиятини молиялаштиришнинг амалдаги манбалари ва тартибини сақлаб қолган ҳолда Соғлиқни сақлаш вазирлиги тузилмасига ўтказилади.
2027 йил 1 январдан эса Соғлиқни сақлаш вазирлиги таркибидан чиқарилади ва мустақил жамғарма сифатида фаолият юритади.
Давлат тиббий суғурта жамғармасининг кузатув кенгаши тиббий ёрдамнинг кафолатланган ҳажми доирасида тиббий хизмат кўрсатиш учун жалб қилинадиган етказиб берувчилар (давлат ва нодавлат)ни, харид қилинадиган тиббий ёрдамлар ҳажмини мустақил белгилайди ва ўз бюджетини шакллантиради.
Давлат бюджети маблағлари ҳисобига имтиёзли тоифага кирувчи шахсларга ташхис қўйиш ва даволаш бўйича тасдиқланган стандартларга мувофиқ тиббий хизматларнинг базавий нархлари Соғлиқни сақлаш вазирлиги томонидан Иқтисодиёт ва молия вазирлиги ҳамда Рақобатни ривожлантириш ва истеъмолчилар ҳуқуқларини ҳимоя қилиш қўмитаси билан келишган ҳолда белгиланади.
Президентнинг 2018 йил декабрдаги қарорида 2021 йилдан бошлаб мажбурий тиббий суғурта тизимини босқичма-босқич жорий этиш белгиланганди. 2020 йил ноябрида давлат раҳбари Сирдарё вилоятида тажриба-синов лойиҳаси доирасида давлат тиббий суғуртасини жорий этиш бўйича қарорни имзолаганди.
[/allow-turbo] Жамият Shuhrat Thu, 07 Sep 2023 18:30:59 +0500