Қозоғистонда беш яшар қизалоқни зўрлаган ва ўлдирган шахсга умрбод қамоқ жазоси берилди
Жиноят ишлари бўйича Туркистон вилояти махсус суди Жибек Жўли қишлоғида беш яшар қизалоққа нисбатан жинсий зўравонлик қилганлик ва уни ўлдирганликда айбдор деб топилган Сайдолим Ғойибназаровни умрбод озодликдан маҳрум қилиш ҳақида ҳукм чиқарди.
Озодликнинг қозоқ хизмати хабарига кўра, суднинг 7 сентябрь куни чиқарилган ҳукмида судланувчи кимёвий кастрация қилишини лозимлиги белгиланган. Бундан ташқари, у маънавий зарар сифатида жабрланувчи томонга 100 миллион танга (шу кундаги курс билан тақрибан 215 минг доллар) миқдорида товон пули тўлаб бериши керак.
Ҳукмга мувофиқ, Ғойибназаров жазони Қўстанайдаги фавқулодда хавфсизлик муассасасида ўтайди.
Жорий йилнинг 1 сентябрида бошланган маҳкамада вояга етмаган қизчага оид иш кўрилгани учун судни ёпиқ тартибда ўтказишга қарор қилинган.
Июль ойида Туркистон вилоятининг Жибек Жўли қишлоғида беш яшар қизча ўлдирилганди. Қийноқ аломатлари бўлган қизалоқ жасади қўшнисининг уйидан топилган.
Қизчанинг отаси аввал судланган қўшнисидан гумон қилиб, икки марта унинг уйига кириб чиққанини, бироқ фарзандини тополмаганини айтган. Учинчи бор қўшнининг уйига қишлоқдаги бир гуруҳ киши кириб, қизчанинг кўйлагинига кўзлари тушган ва уни астойдил қидиришга тушишган.
Қизалоқнинг ўлимига оид хабар бутун қишлоқни даҳшатга солган ва маҳаллий турғунлар гумонланувчини ўзларига топширишни талаб қилишган. Қишлоққа полиция наряди йўлланган, интернет эса ишламай қолган.
Маълумотларга кўра, қизчани ўлдирганликда гумонланган шахс 2006 йили қотиллик бўйича судланиб, 10 йилга қамалган. 2023 йилнинг май ойида эса у, маҳаллий нашрларнинг ёзишича, “киши соғлиғига қасддан оғир шикаст етказганлик” учун судланиб, уч йилга озодлиги чекланган. Иш материалларига кўра, у ароқ ичилганидан кейин чиққан жанжал пайтида қишлоқдошини болта билан урган. Қизчанинг ўлимидан кейин уч йилга озодликни чеклаш бўйича ҳам текширув ўтказилиб, ҳукм ноқонуний деб топилган. Текширув якунларига кўра, Туркистон вилояти Сариағаш туман суди раисини лавозимидан озод қилиш масаласи кўтарилган.