Мол-мулк ва ер солиғи бўйича энг кўп қарздор ташкилотлар маълум қилинди
Ўзбекистондаги ташкилотлар ходимларида мол-мулк ва ер солиғи бўйича 563 миллиард сўмдан ортиқ қарздорлик мавжуд. Бу ҳақда Солиқ қўмитасининг “Фискал таҳлиллар” Телеграм-каналида маълум қилинди.
Қайд этилишича, жисмоний шахслар томонидан мол-мулк ва ер солиғи солиқ даври учун 15 апрель ва 15 октябрга қадар тенг улушларда тўланиши лозим. 16 октябрда ушбу солиқларни тўлаш муддати тугади.
Аммо, корхона ва ташкилотларда ишловчи даромад манбаига эга бўлган ишчи-ходимларнинг ҳаммаси ҳам мол-мулк ва ер солиқлари тўловини белгиланган муддатда амалга оширмасдан келмоқда.
Жумладан, 2023 йил 17 октябрь ҳолатига 181,7 мингта ташкилотнинг 817,7 минг нафардан ортиқ ходимида 960,4 мингта солиқ обекти бўйича 563,1 миллиард сўм (мол-мулк солиғи бўйича 209,1 миллиард сўм ва ер солиғи бўйича 354 миллиард сўм) тўланмаган солиқ қарздорлиги мавжуд.
Шундан:
– 133,2 миллиард сўм — буджет ташкилотлари ходимлари;
– 24,8 миллиард сўм — нодавлат-нотижорат ташкилотлари ходимлари;
– 405,1 миллиард сўм — тижорат ташкилотлари ходимлари ҳисобига тўғри келади.
Ходимларида солиқ қарзи кўп бўлган ташкилотлар Топ-3 лигидан “Навоий кон-металлургия комбинати” АЖ (3,4 миллиард сўм), “Ҳудудий электр тармоқлари” АЖ (3 миллиард сўм), “Ҳудудгазтаъминот” АЖ (2,8 миллиард сўм) эгаллади.