Reuters: Эрон Исроил ҳужум қилмаса уруш очмаслигини билдирди
Эрон Исроил ёки АҚШ тўғридан-тўғри босқин қилмаса, Исроилга қарши уруш очмайди. Бу ҳақда номи айтилмаган манбаларига таянган ҳолда Reuters хабар берди.
Агентликнинг бир биридан мустақил бўлган уч манбаси Эрон олий руҳонийси Али Хаменеи АҚШ ва Европа Иттифоқида террорчи ташкилот сифатида кўриладиган ҲАМАС раҳбари Исмоил Ханий билан ноябрь аввалида ўтказган учрашувида “бу ҳақда аниқ мужда берган”и ҳақида маълум қилган.
Reuters манбаларининг айтишича, Эрон олий руҳонийси ҲАМАС раҳбарига “Сизлар бизни 7 октябрда Исроилга ҳужум қилишингиз ҳақида огоҳлантирган эмассиз ва биз сизнинг номингиздан бу урушга аралашмаймиз”, - деб билдирган.
Манбаларнинг айтишича, Хаменеи ҲАМАСни узоқ йиллардан бери дастаклаб келаётган Эрон гуруҳга “сиёсий ва маънавий қўллов кўрсатиш”да давом этишини таъкидлаган.
Агентликнинг Теҳрон ҳукуматига яқин бўлган олти манбаси берган маълумотларга кўра, Хаменеи “Исроил ёки АҚШ тўғридан-тўғри Эронга ҳужум қилмагунича, конфликтга аралашмаслигини аниқ билдирган”.