Қурилиш соҳасида электрон рейтинг ҳамда электрон тендер платформалари жорий этилди
Қурилиш ва уй-жой коммунал хўжалиги вазирлигининг маълум қилишича, қурилиш соҳасида давлат харидларида очиқликни таъминлаш ва коррупциявий хавф-хатарларни камайтириш бўйича электрон рейтинг ҳамда электрон тендер платформалари жорий этилди.
“Шаффоф қурилиш” МАТ негизидаги “Рейтинг” ахборот тизимида қурилиш-пудрат ва лойиҳа-қидирув ташкилотлари томонидан тендер савдоларида иштирок этиши учун уларнинг рейтинглари ҳисоблаб борилмоқда. Шунингдек, корхоналарнинг рейтинги давлат органларининг ахборот тизимлари билан интеграция қилиш орқали шакллантирилган.
Рейтинг платформасида ўтган йилда жами 20 минг 140 та қурилиш-пудрат ташкилоти мавжуд бўлган бўлса, ҳозирги даврга келиб 23 минг 576 тага кўпайди. Шунингдек, электрон рейтингда мавжуд корхоналар томонидан жорий йилда 2021 йилга нисбатан, солиқ тушумлари 41 трлн. сўмга, махсус техникалари сони 2 баробарга, банд бўлган аҳоли сони 58 фоизга ортган.
Қурилиш соҳасида давлат харидларининг ўтказилишини таъминловчи махсус электрон платформа вазирлик ва идораларнинг тизимларига интеграциялашган равишда иштирокчилар ҳақидаги маълумотларни инсон омилисиз автоматик равишда олиш имконини беради. Инсон омили бартараф этилгани ҳисобига ҳамда очиқ ва шаффоф талаблар белгиланиши натижасида қурилиш-пудрат ташкилотлари ўртасида рақобат муҳити тобора соғломлашиб бормоқда.
Хусусан, платформада жами 47 минг 546 та тендер ўтказилган бўлиб, уларда жами 12 минг 749 та ташкилот иштирок этган. Ўтказилган тендерларнинг жами қиймати 35,85 трлн. сўм бўлиб, ушбу тендерларда 34,08 трлн. сўмлик шартномалар тузилган. Электрон тендер платформасида тежаб қолинган маблағлар 1,78 трлн. сўмни ташкил этади.
Шуни алоҳида таъкидлаш керакки, тендерларда инсон аралашувига йўл қўйилмагани натижасида давлат объектларида иштирокчилар сони доимий ортиб бормоқда. 2022 йилда битта тендерда қатнашувчиларнинг ўртача сони 4 та бўлган бўлса, бугунги кунда ўртача 6 та иштирокчи қатнашмоқда.