Данияда сунъий интеллект сабаб янги маълумотлар марказларига чеклов қўйилди
Дания ҳукумати янги маълумотлар марказларини электр тармоқларига улаш бўйича шартномалар тузишни вақтинча тўхтатди. Бунга инфратузилма ўтказувчанлигидан бир неча баробар ошиб кетган аризаларнинг мисли кўрилмаган ўсиши сабаб бўлди. Бу ҳақда Ixbt.com хабар беради.
"Энергинет" давлат оператори маълумотларига кўра, ҳозирги кунда навбатда турган лойиҳаларнинг умумий қуввати қарийб 60 гигаваттни ташкил этади. Таққослаш учун, бутун мамлакат бўйлаб электр энергиясининг энг юқори истеъмоли атиги 7 гигаваттга тенг.
Барча топширилган аризаларнинг тўртдан бир қисми маълумотларни қайта ишлаш марказларига тўғри келади. Сунъий интеллект ривожланиши билан боғлиқ бундай юқори талаб ҳукуматни энергия тақсимлаш устуворликларини қайта кўриб чиқишга мажбур қилди.
Мутахассисларнинг фикрича, Дания сценарийси бутун Европа учун намуна бўлиши мумкин. Ҳукуматлар сунъий интеллект сармояларидан олинадиган иқтисодий фойда ва энергетика хавфсизлиги ўртасида танлов қилишга мажбур бўлмоқда.
Маълумотлар марказлари эҳтиёжлари туфайли энергия тизимларининг қизиб кетиши муаммоси глобал тус олмоқда. АҚШнинг Мен штати янги марказлар қурилишини тўлиқ тақиқлашга яқин келган бўлса, Виржиния ва Оклахомада мораторийлар масаласи фаол муҳокама қилинмоқда.