OpenAI GPT-5.5 Instant моделини тақдим этди
OpenAI компанияси ChatGPT учун янги GPT-5.5 Instant базавий моделини ишга туширди. Ушбу янгиланиш аввалги GPT-5.3 Инстант моделини алмаштиради ва барча фойдаланувчилар учун бепул тақдим этилади. Компания интерфейс ёки тариф режаларини ўзгартирмасдан, сунъий интеллектнинг аниқлигини ошириш ва мулоқотни янада табиийроқ қилишга эътибор қаратмоқда. Бу ҳақда Ixbt.com хабар беради.
OpenAI маълумотларига кўра, тиббиёт, ҳуқуқ ва молия каби мураккаб соҳаларда нотўғри маълумотлар бериш ҳолатлари 52,5 фоизга, ноаниқ жавоблар эса 37,3 фоизга қисқарган. Айниқса, узоқ давом этадиган суҳбатларда моделнинг барқарорлиги сезиларли даражада ошган. Шунингдек, GPT-5.5 Instant тасвирларни таҳлил қилиш, аниқ фанлар (СТEМ) бўйича саволларга жавоб бериш ва қачон интернетдан қидирувни амалга ошириш кераклигини аниқлашда анча самарали ишлайди.
Янги модел контекстни тушунишда ҳам катта ютуқларга эришди. Эндиликда ChatGPT фойдаланувчи билан бўлган суҳбатлар тарихи, юкланган файллар ва ҳатто уланган Gmail почтасидаги маълумотлардан янада самарали фойдаланиб, шахсийлаштирилган жавобларни тақдим этади. Фойдаланувчилар энди модел қайси хотира маълумотларига таяниб жавоб берганини кузатишлари мумкин.
OpenAI ушбу янгиланиш орқали кундалик фойдаланишда янада аниқ ва лўнда жавобларни тақдим этишни мақсад қилган. Юз миллионлаб одамлар фойдаланадиган Инстант модели учун бу каби кичик ўзгаришлар фойдаланувчи тажрибасини сезиларли даражада яхшилайди. Янгиланган модел аллақачон барча фойдаланувчилар учун очиқ.