Ўзбекистонда блогерлар даромади жиддий назоратга олинмоқда
Солиқ қўмитасида ташкил этилган очиқ мулоқотда блогерлар фаолиятини солиққа тортиш масаласи атрофлича муҳокама қилинди. Мутасаддиларнинг таъкидлашича, ҳозирча мазкур йўналишни тўлиқ тартибга солиш бўйича таҳлил ва ўрганиш ишлари олиб борилмоқда.
Маълум қилинишича, соҳани чуқур таҳлил қилиш мақсадида мамлакатдаги энг фаол 110 нафар блогернинг алоҳида рўйхати шакллантирилган. Ўрганишлар давомида уларнинг катта қисми турли ҳуқуқий мақомда иш юритаётгани аниқланган.
Жумладан, 55 нафар блогер ўзини ўзи банд қилган шахс сифатида рўйхатдан ўтган бўлса, 33 нафари якка тартибдаги тадбиркор сифатида фаолият олиб бормоқда. Қолган 22 нафар блогер эса оддий жисмоний шахс мақомида ишлаётгани маълум бўлган.
Солиқ қўмитаси вакилларининг қайд этишича, бу ҳолат блогерлик фаолиятининг реал иқтисодий кўлами билан унинг расмий ҳуқуқий мақоми ўртасида муайян тафовут борлигини кўрсатмоқда.
Масалада айниқса аудиторияси жуда катта бўлган топ-блогерлар фаолиятига алоҳида эътибор қаратилган. Хусусан, 3 миллиондан ортиқ обуначига эга 6 нафар машҳур блогернинг фаолияти таҳлил қилинган.
Маълумотларга кўра, 2025 йил давомида мазкур блогерлар томонидан ижтимоий тармоқларда 360 та “сторис” ва 184 та реклама характеридаги пост жойлаштирилган.
Электрон ҳисобварақ-фактуралар асосида олинган рақамларга кўра, ушбу блогерларнинг умумий даромади 2,7 миллиард сўмни ташкил қилган. Шу маблағдан бюджетга 110,4 миллион сўм солиқ тўлангани айтилди.
Учрашув давомида иштирокчиларга реклама орқали олинадиган даромадларни солиққа тортиш тартиби ҳам батафсил тушунтирилган. Мутасаддиларнинг таъкидлашича, ўзини ўзи банд қилган шахс мақоми расман ходим ёллаш ҳуқуқини бермайди. Бироқ амалда айрим блогерлар томонидан администраторлар, монтажчилар ва бошқа мутахассислар жалб қилинаётгани кузатилмоқда.
Солиқ қўмитаси масъуллари блогерлик соҳасини қонунчилик талабларига мослаштириш, даромадларнинг шаффофлигини таъминлаш ва рақамли иқтисодиётда солиқ тизимини тартибга солиш бугунги куннинг муҳим вазифаларидан бири эканини таъкидлади.
Кузатувчилар фикрича, яқин йилларда блогерлик фаолияти учун янада аниқ ҳуқуқий механизмлар ва янги солиқ тартиблари жорий қилиниши эҳтимоли юқори.