Петербургдан 220 мухожир Хоразмга олиб келинди. Ростов-Дондан Тошкентга 8 сентябрда поезд йўлга чиқади
Санкт-Петербургдан Урганчга 8 сентябрь куни махсус чартер рейс орқали 220 нафар ўзбекистонлик олиб келинди. Бу ҳақда Хоразм вилояти Транспорт бошқармаси матбуот хизмати маълум қилди.
Хориждан қайтганлар 10 кундан кам бўлмаган муддатга карантин марказларига жойлаштирилди.
Хабарда таъкидланишича, Хоразмдан Москва ва Санкт-Петербургга тўртта чартер рейси уюштирилган ва жами 840 нафар ўзбекистонлик олиб келинган.
Айни пайтда 8 сентябрь куни Ростов-Дондан ҳам 940қа яқин ўзбекистонлик йўловчидан иборат поезд Тошкентга қараб йўлга чиқиши кутилмоқда.
Ўзбекистоннинг Ростов-Дондаги бош консули Рустам Курганбаев яқин орада Ростов-Дондан яна 3 мингга яқин ўзбекистонлик ватанига жўнатилишини билдирди. Унга кўра, шу кунгача Ўзбекистонга олти авиарейс ва икки поезд жўнатилган.
Озодлик радиоси 7 сентябрда Ўзбекистонга қайтиш учун Қозоғистон йўл беришини кутиб, Самара область, Кинель шаҳри яқинида 3-4 минг ўзбекистонлик тўпланиб қолганини хабар қилди.
Ўзбекистон Транспорт вазирлиги август ойида Россия-Қозоғистон чегарасидан ўтолмай Оренбург ва Самара вилоятларида тўпланиб қолган ўзбекистонликларни ватанига қайтариш жараёни бошлангани ҳақда хабар қилган эди.