6 үсмер утырган «Хонда» күрше авылга барганда әйләнеп каплана – 2 кыз үлә, 4 малай имгәнә
Алтай краеның Кош-Агач районында 15әр яшьлек ике кыз авариядә һәлак булган. Якынча белешмә буенча, әлеге авариядә 2 үсмер үлгән, тагын 4 бала имгәнгән. Бу турыда «Комсомольская правда» хәбәр итте.
Авария 15 майга каршы төндә – 03.04 сәгатьтә була. Машина салонында 4 малай һәм 2 кыз утыра. Балалар бер авылдан икенчесенә таба «Honda Accord» машинасында барырга чыккан.
Алтай прокуратурасы белешмәсе буенча, йөртүче машина белән идарәсен югалта һәм юлдан чыгып китә, машина әйләнеп каплана. Тикшерү комитеты тикшерү эшләре башлаган.
«КП» чыганагы белешмәсе буенча, балалар чит кеше машинасын техник хезмәт күрсәтү сервисыннан (СТО) алып чыгып киткән. Әлеге СТО хуҗасы – авариягә очраган балаларның берсенең атасы. Алты үсмернең кайсысы рульдә булуы әлегә ачыкланмаган, диелә хәбәрдә.
Алтай крае прокуратурасы хәбәр иткәнчә, якынча белешмә буенча, «Honda Accord» машинасын йөртүче Кокоря авылы ягыннан Кош-Агач авылына таба идарәсен югалта. Аннары машина юлдан чыгып каплана.
Авариядә 2008 елда туган 2 кыз бала үлә. Балигъ булмаган яшьтәге тагын 4 үсмер төрлечә имгәнә, аларны хастаханәгә илткәннәр, диелә хәбәрдә.