Փաթեթային լուծումը կարող է փոխվել ու դառնալ հանգրվանային, ինչը մեր շահերից չի բխում. Կիրո Մանոյան
ՀՅԴ Հայ դատի և քաղաքական հարցերի գրասենյակի ղեկավար Կիրո Մանոյանն այսօր մամուլի ասուլիսին անդրադառնալով Սանկտ Պետերբուրգում կայացած Հայաստանի և Ադրբեջանի նախագահների հանդիպմանն ու համատեղ հայտարարությանը, ասաց, որ այն մի քանի բանի մասին է խոսում, որոնց իրագործումը ժամանակի ընթացքում կտեսնենք:
Բանախոսը նկատեց, որ կարծես թե, խոսվել է ամեն ինչի մասին՝ վերահսկման մեխանիզմների հաստատման, ԵԱՀԿ դիտորդների թվի ավելացման մասին և ընդհանուր տպավորությունը դրական է:
«Մեր մտահոգությունն այն է, որ երբ լուրջ բանակցություններ սկսվեն հարցի կարգավորման շուրջ, կարծում եմ, որ հայկական կողմի վրա, Լեռնային Ղարաբաղի վրա ճնշումները կմեծանան, որովհետև պարզ է, որ իրենք պետք է ուզենան բավարարող բան տալ Ադրբեջանին և այդ կարող է լինել այն, որ առանց բոլոր սկզբունքների շուրջ վերջնական համաձայնության, սկսեն մշակել համապարփակ համաձայնագիրը, ինչը կարող է այլ հետևանքներ ունենալ»,- ասաց նա և նշեց, որ այդ դեպքում կարող է գալ մի պահ, երբ համանախագահներն ասեն, եթե այսքանին համաձայնել եք, եկեք կիրառենք:
«Այսինքն՝ փաթեթային լուծումը կարող է փոխվել և դառնալ հանգրվանային լուծում, ինչը մեր շահերից չի բխում»,- ասաց նա և նշեց, որ թեև Դաշնակցությունը հիմնական սկզբունքներին համաձայն չէ, ամեն դեպքում դա ինչ-որ տեղ ՀՀ իշխանությունների կողմից որպես բանակցային հիմք ընդունվել է և կարող է խեղաթյուրվել:
Tert.am-ի հարցին, թե Ադրբեջանի նկատմամբ ճնշումների հավանականություն տեսնում եք, այդ թվում՝ հետաքննական սարքերի տեղադրման առումով, Կիրո Մանոյանն ասաց, որ միջազգային հանրությունը փաստորեն ճնշում բանեցնում է, որպեսզի Ադրբեջանը համաձայնի վստահության մթնոլորտին ուղղված մեխանիզմների տեղադրմանը: «Ու դա Ադրբեջանի վրա ճնշումի հետևանք է, այնպես չէ, որ իր պարզ ցանկությամբ է Ադրբեջանը համաձայնում»,- ասաց նա։