ევროკავშირის წევრთა უმრავლესობა მხარს უჭერს საქართველოსთვის უვიზო რეჟიმის დაწესება - მარინა კალიურანდი
„ესტონეთთან ერთად, ევროკავშირის წევრთა უმრავლესობა მხარს უჭერს საქართველოსთვის უვიზო რეჟიმის დაწესებას,“ - ეს განცხადება ესტონეთის საგარეო საქმეთა მინისტრმა ქართველ ჟურნალისტებთან ვიზალიბერალიზაციასთან დაკავშირებით გააკეთა.
მარინა კალიურანდიმ აღნიშნა, რომ ესტონეთი მხარს უჭერს საქართველოს მოსახლეობისათვის უვიზოდ მიმოსვლის მინიჭებას. მანვე აღნიშნა, რომ საქართველომ ყველა ვალდებულება შეასრულა.
„განვიხილეთ ვიზალიბერალიზაცია, მზადება ნატოსთვის, საქართველოს ევროატლანტიკური ინტეგრაცია, ჩვენი ორმხრივი ურთიერთობა და თანამშრომლობის განვითარება. ესტონეთთან ერთად, ევროკავშირის წევრთა უმრავლესობა მხარს უჭერს საქართველოსთვის უვიზო რეჟიმის დაწესებას. ამაზე კითხვები არ არსებობს. არსებობს მხოლოდ ერთი კითხვა, - როდის მოხდება. ესტონეთის დღის წესრიგში რჩება ეს თემა, რადგან საქმე ეხება ნდობას და საქართველომ ყველა პირობა შეასრულა. ახლა ევროკავშირზეა დამოკიდებული გადაწყვეტილების მიღება და ჩვენ ამას გავაკეთებთ,“ - განაცხადა მარინა კალიურანდიმ.
სტრასბურგში ქართული დელეგაცია ესტონეთის საგარეო საქმეთა მინისტრს შეხვდა. შეხვედრა ევროსაბჭოს საპარლამენტო ასამბლეის საზაფხულო სესიის ფარგლებში გაიმართა.
ავტორი: თამარ ნუცუბიძე