Тӳрĕ лини усăллă иртрĕ
Чăваш Ен Пуçлăхĕ Олег Николаев паян республикăра пурăнакансемпе тӳрĕ лини ирттерчĕ. Регион ертӳçи Хушăвĕпе килĕшӳллĕн тулли мар мобилизацие лекнисен çемйисене пулăшупа тивĕçтерессине, координаци центрĕн ĕçĕ-хĕлĕ пирки каласа пачĕç. Республикăра пурăнакансем хăйсене кăсăклантаракан ыйтусене пама пултарчĕç.
Тулли мар мобилизацие лекнĕ Тăван çĕршыв хӳтĕлевçисене тата вĕсен çывăх çыннисене социаллă пулăшупа тивĕçтересси. Шăпах çак темăна сӳтсе яврĕç Чăваш Республикин наци вулавăшĕнче йĕркеленĕ тӳрĕ линире. Чăваш Ен Пуçлăхĕ Олег Николаев 22 ыйтăва хуравлама ĕлкĕрчĕ. Пĕрремĕш ыйту – Шупашкарти тата ытти муниципалитетри координаци канашĕн ĕçĕ-хĕлĕ пирки пулчĕ.
– Вĕсен калăпăшĕ, вĕсем нумаях пулманни, эпир паян туса пыракан ĕç самаях лайăх шайра тăрать пек туйăнать. Тĕп тĕллев – кашни çын хăйĕн прависене кайса хăйсене валли мĕнле пулăшу илмеллине пĕлсе тăтăр тесе, çавăнпа çакăн пек центрсем кашни районта пур. Мĕнле те пулин ыйтусем пур пулсассăн 122 телефон номерĕпе шăнкăравлама пултараççĕ.
Хушма пулăшу парасси тата тулли мар мобилизаципе кайнă салтаксене мĕн пур тӳлевпе тивĕçтернĕ-и? Ун пирки те ыйтакансем пулчĕç.
– 84 процент ытла çын çак укçана илме ĕлкĕрнĕ. Ку ĕнтĕ çак йышăнусене пурнăçа кĕртнĕ хыççăн темиçе Правительство йышăнăвĕсене кĕртмелле. 2-3 эрнерен хăвăрт пулман. Эпир эрне хушшинче çак ĕçе туса пĕтернĕ тесен те юрать. Тӳрĕ лини вăхăтĕнче социаллă тетелтен, кол-центр пуçтарнă мĕн пур ыйтăва пăхса тухаймарĕç пулин те вĕсене малашне ĕçе кĕртме палăртнă.