Ăшăпа тивĕçтерекен тытăмăн диспетчер служби хута кайрĕ
Чăваш Енре ăшăпа тивĕçтерекен тытăмăн диспетчер служби хута кайрĕ. Вăл пулăшнипе сетьсене тата объектсене сăнаса тăма тата унта сиксе тухакан пăтăрмахсене вăхăтра татса пама май пулĕ. Информаци службин ĕçĕ-хĕлĕпе, ăна малашлăхра аталантармалли тĕллевсемпе Чăваш Республикин Пуçлăхĕ Олег Николаев та паллашрĕ.
Хĕл кунĕсем çывхарнă май тĕрлĕ объектсене ăшăпа тĕрĕс-текел тивĕçтерсе тăрас ыйту мала тухать. Котельнăйсен юсавлăхне, вĕсенче пулса иртекен улшăнусене ăшăпа тивĕçтерекен тытăмăн диспетчер службинче сăнаса тăраççĕ.
НАДЕЖДА ГИНИНА: «Шăнкăрав килет, эпир ăна çырса хуратпăр, йышăнатпăр, çав адреспа мĕнле аварийный бригадăна кĕрет, юсав ĕçĕсем тăвакан бригадăна шăнкăравлатпăр. Пурĕ пĕрле 130 шутлă кĕртнĕ программăна. Районсенче шкулсем, больницăсем çавăн пек обслуживать тума».
Информаци пĕрлĕхне йĕркелес ĕç 2021-мĕш çултах пуçланнă. Хальхи вăхăтра унта ăшă энергийĕн 130 çăл куçне тĕрĕслесе тăраççĕ пулсан, 2023-мĕш çулта вара çак хисепе 520-е çитересшĕн. Унсăр пуçне диспетчер тытăмне нумай хваттерлĕ çуртсене те кĕртме палăртаççĕ. Информаци службинче тăрăшакансем котельнăйсенче е тата ытти объектра юлашки 3 уйăхра ирттеренĕ ĕçсене курса тăрĕç. Çакă кĕтмен çĕртен сиксе тухакан инкеклĕ лару-тăрусен сăлтавĕсене тишкерме, вĕсем çинчен асăрхаттарма пулăшмалла. «Çак тытăма пула эпир перекетлĕн ĕçлесе укçа-тенкĕне инфратытăм инвестицийĕсене яма пултарăпăр», палăртрĕ Олег Николаев. Тĕл пулу предприяти ертӳçисемпе ирттернĕ канашлупа вĕçленчĕ.