Наркотикпе усă куракансемпе кĕрешеççĕ
Чăваш Енре «шурă вилĕм» сутса укçа тăвакансем, наркотиксемпе усă куракансем лăпланасшăн мар. Ытларах сиенлĕ хатĕрсене Мускав, Питĕр хулисенчен кӳрсе килеççĕ. Вĕсене вăхăтра тупса палăртса тĕрĕс çул çине тăратма Шалти ĕçсен министерствинче вăй хуракансене пилотсăр хатĕрсем те пулăшаççĕ. Кун çинчен тĕплĕнрех наркотикăн саккунсăр çаврăнăшĕпе кĕрешес тĕллевпе йĕркеленĕ Правительство комиссийĕн черетлĕ ларăвĕнче калаçрĕç.
Пуçа минретекен тĕрлĕ хутшпа айкашакансен шучĕ çу тата кĕр тапхăрĕсенче ытларах палăрать. Шăпах çак вăхăтра наркăмăшлă курăксем пулса çитеççĕ. Вĕсене Чăваш Ене ытларах кӳршĕллĕ регионсенчен илсе килеççĕ. Шалти ĕçсен министерствин наркотиксен çаврăнăшĕпе кĕрешекен управленийĕн Чăваш Енри уйрăмĕн пуçлăхĕ Сергей Наумов каланă тăрăх кăçал Улатăр, Вăрнар, Канаш, Çĕрпӳ, Шупашкар, Çĕмĕрлĕ районĕсенче, Çĕнĕ Шупашкарпа Шупашкар хулисенче наркотикăн саккунсăр çаврăнăшĕпе усă курнă тĕслĕхсем çирĕплетнĕ. Çакнашкал киревсĕр ĕçсен шутне чакарас, çитĕнекен ăрăва тĕрĕс çул çине тăратас тĕллевпе республикăра сахал мар ĕç туса ирттереççĕ. Сăмхран, çул çитмен ачасем çамрăкранах тĕрлĕ профессире вăй хурса укçа ĕçлесе илме хăнăхаççĕ.
АЛЁНА ЕЛИЗАРОВА: «Кăçал ĕçпе тивĕçтерекен центрсем урлă 15 214 çамрăк вăхăтлăх ĕçе вырнаçнă. Çамрăксене ĕç укçипе пĕрле республика бюджетĕнчен уйăрнă укçапа хушма тĕрев кӳретпĕр. Вăл уйăхсерен 2 250 тенкĕпе танлашать».
Республика Пуçлăхĕ Олег Николаев çул çитмен çамрăксене ĕçпе тивĕçтерес тапхăрта министерствăсене тата тĕрлĕ тытăма явăçтармаллине каларĕ. Çак енпе çыхăннă хатĕрленӳ ĕçĕсене вăл çитес çулхи кăрлач уйăхĕнче туса пĕтерме хушрĕ.