Мобилизациягә эләккән Омск өлкәсе Тәвриз районы баш имамы Руслан хәзрәт һәлак булган
Күптән түгел махсус хәрби операциядә Омск өлкәсе мөфтиенең Төньяк районнар буенча урынбасары, Тәвриз (Тевриз) районының баш имамы Руслан хәзрәт Вахитов һәлак булган. Бу турыда Омск өлкәсе Диния нәзарәте хәбәр итә.
«Мулла из-за угла» Телеграм каналында Руслан хәзрәтнең Себер татарлары балалары өчен Коръән шигырьләре бәйгесендә чыгышы эленгән. Ул әтисе Абдел-Вахед Вәлиулла эшен дәвам итәчәге турында сөйли.
«Әлхәмделиллаһ, алга таба да мәчетләр төзүне дәвам итәрбез. Ел саен шушыны дәвам итәрбез», – дип планнары белән уртаклаша Руслан хәзрәт.
«Руслан хәзрәт бик ихлас һәм актив дин эшлеклесе иде. Мәчетләр төзеде, татар зиратларын күзәтеп торды, яшьләрне тәрбияләде, аларны укырга кертте. Омск җәмгыяте өчен бу бик зур югалту.
Кызганычка каршы, пуля белән җәрәхәтләнгән гәүдәсе сугыш кырында ятып калган һәм Омск өлкәсе мөселманнары үзенең остазы һәм укытучысы гәүдәсен туган җиренә тапшыра алмады», – дип язганнар телеграм каналда.
Руслан хәзрәткә 53 яшь булган. Ул һава десантында хезмәт иткән, Әфган сугышында катнашкан булган.