Илназ Гарипов өйләнде: «Эльвина артыннан 4 ел чабып йөрдем!»
Шушы көннәрдә социаль челтәрләр гөж килде, чөнки татар эстрадасындагы иң популяр буйдак егетләрнең берсе – Илназ Гарипов өйләнде. Әлеге куанычлы вакыйга белән тәбрикләргә дип, җырчының үзенә шалтыраттык.
«Безне Ренат Галиәскәр таныштырды»
Илназ, чын күңелдән никахың белән тәбрик итәм. Гомерлек булсын! Кәләшең белән таныштыр әле. Эльвина кайсы яклардан? Нәрсә белән шөгыльләнә?
Эльвина – Кыргызстанда туган татар кызы. Соңрак алар әти-әниләре белән Түбән Камага күченеп кайтканнар. Ә без танышканда, булачак кәләшем Мәскәүдә яши иде. Ул анда җиләк-җимеш сату компаниясендә финансист булып эшли.
Мин Эльвина артыннан 4 ел чабып йөрдем! (көлә).
4 ел! Очрашып йөргән еллар белән бергәме бу?
Ул мине 1 ел бөтенләй якын китермәде. Хатларыма иренеп кенә җавап яза иде, бөтенләй җавап бирмәгән вакытлары да булды.
Безне Ренат Галиәскәр таныштырды. Аның белән Кукмарада туй алып бара идек. «Залда бер матур кыз утыра», – ди миңа Ренат. Бәйрәм беткәч, Эльвинаның дус кызы, безнең янга килеп, фотога төште. Эльвина төшәргә теләмәде. Баксаң, ул татар эстрадасы белән бөтенләй кызыксынмый торган кеше икән. Минем җырчы икәнлекне дә белмәгән. Хәзер ул көнне искә төшереп, көлешеп утырабыз.
Шул туйда ошатып калдым да очрашу юлларын эзли башладым. Туйда төшкән фотоны куеп, иптәш кызы мине социаль челтәрләрдә билгеләгән иде. Аның аша телефонын табып, Эльвинага яздым. Язам-язам – җавап бирми. Шулай итеп, 4 елга җыелды (көлә).
Фото: © Илназ Гариповның шәхси архивыннан
Аның тарафыннан мәхәббәт уты кайчан кабынды соң?
Баштагы чорда симпатия булгандыр. Ә мәхәббәт уты кайчан кабынды, дигәндә, моннан 2 ел элек җитди итеп очраша башладык. Безнең бит әле ара ераклыгы да бар иде. Мин Казанда, ул Мәскәүдә яшәдек. Җай чыккан саен очрашып, телефон аша аралашып тордык.
Нигә Эльвина башта ук йөрергә теләмәгән икән синең белән?
Ул шул кабул итмәве белән җәлеп иткәндер дә әле мине. Алай дисәң, күңелемә ошагач, шунда ук кабул итсә дә йөреп киткән булыр идек.
Син аны беренче күрүдә үк ошаткансың. Эльвина кайсы ягы белән җәлеп итте сине?
Ул – бик матур, шул ук вакытта тыйнак кыз. Туйда да тыныч кына утырды, артык күзгә бәрелеп тормады. Әнә шул сыйфаты аеруча ошады. Эльвинаның хәтта, социаль челтәрләрендә дә бер генә фото. Ул хәзерге заман кызларына охшамаган.
Алайса, һәр адымын социаль челтәрләрдә күрсәтеп бармый инде.
Юк-юк, «замана тенденцияләре»нә бирешми торган кыз.
Тыйнак, акыллы, тәмле пешерә?
Миңа булачак тормыш иптәшемнең тәмле пешерү-пешермәве мөһим түгел иде. Мин андый әйберләргә бик җиңел карыйм, дөресен әйткәндә. Ләкин Эльвина, чыннан да, бик тәмле пешерә булып чыкты.
Фото: © Илназ Гариповның шәхси архивыннан
«Профессиямне аңлап кабул итә»
Димәк, кәләшең синең җырчы икәнлекне белмәгән. Очраша башлагач, синең һөнәрең аны борчуга салмадымы?
Белмәгән һәм Аллаһка шөкер. Ул минем профессиямне аңлап кабул итә. Мин элек тә атналар буе кайтып керми гастрольләрдә йөрүләрне яратмый идем. Миңа өйдә үткәргән вакыт бик кадерле. Шуңа да, хәзер күбрәк продюсерлык өлкәсендә эшлим. Күпчелек вакыт оештыру эшләре белән үтә. Күзәтеп барсагыз, күрәсездер, татарча да, русча да җырлар башкарам.
Репертуарга русча җырлар килеп керү нәрсә белән бәйле?
Руслар арасыннан татарларны җыеп алу максатыннан, русча җырлый башладым.
Килеп чыгамы соң?
Килеп чыга кебек. Башкаларга татарлык ул – Сабантуй белән чәк-чәк кенә түгел икәнлекне аңлатырга кирәк.
Җырларга аранжировка ясау, саундпродюсерлык, бәйрәмнәр оештыру белән дә шөгыльләнәбез. Әле менә күптән түгел безнең компаниядә Рамил Шәрәповка «Әти» дигән бик матур җыр эшләдек.
Бу өлкәдә гаиләне алып барырлык акча эшләп буламы?
Безгә җитә! Теләсә кайсы эштә гаиләне алып барырлык акча эшләргә була. Эшнең начары юк. Барысы да ничек эшләвеңнән тора.
«Тәкъдим ясагач, «кеше янында оялттың» дип сүкте»
Аз гына темадан читкә киттек. Эльвинага тәкъдимне ничек ясадың?
Бик кызык кына килеп чыкты ул. Тәкъдимне Мәскәүдә ясадым. Аю киеме киендем дә, листовка тараткан булып, ул эштән кайта торган юл янына барып бастым. Эльвина яныма килеп җиткәч, «чык миңа кияүгә» дигән листовка бирдем. Ләкин аның реакциясе мин көткәнчә булмады – ул югалып калды. Аннан мине «кеше янында оялттың» дип сүкте. Ул – публика игътибарына ияләнмәгән кеше.
Эльвинаның якыннары белән ничек таныштыгыз? Сине ничек кабул иттеләр?
Казанда булганда бергәләп кайтып килдек. Мине искиткеч кабул иттеләр. «Тиле тещасын мактый» диләр бит (көлә). Минем тещадан да идеаль кеше юк. Әби минем җырчы икәнне дә белә иде. Аның белән әле Эльвина белән йөри башлаганчы ук таныштык. Тоттым да: «Сезнең кызыгыз белән аралашам, очраша башларга ярыймы?» – дип яздым. Рөхсәт бирде.
Алайса әбинең күңелен баштан ук яулагансың инде. Нинди тәрбияле егет, дип уйладымы икән.
Белмим бит, сорарга кирәк. Без болай да тәрбиясез түгел идек кебек (көлә).
Эльвинаны кулын сорарга кемнәр белән кайттың?
Эльвина: «Илназ мине сорарга килә», – дигәч, әби: «Үзе генә читенсенсә, дуслары белән килсен», – дип әйткән булган. «Үзем генә киләм, мин бит куркак түгел», – минәйтәм (көлә).
«Илсөя – бертуган апам кебек якын кеше»
Никах кайда, ничек узды?
Никах Казандагы бер мәҗлесләр залында, үзебезнең гореф-гадәтләргә туры китереп, милли стильдә узды. Туган-тумачалар, дусларны гына чакырдык. Иң якын кешем – әтием ягыннан 86 яшьлек әбиемне дә алып килдек. Без аны, яратып, «әти-әби» дип йөртәбез. Безне тәрбияләүгә бик зур өлешен керткән кеше ул. Кызганычка, әти-әнием гүр ияләре инде. Язмышка шулай язган булгач, берни эшләтеп тә булмый. Әти-әнием урынына түргә, зурлап, әбиемне утыртып куйдык.
Никах бик күңелле, мәгънәле үтте. «Сорнай» ансамбле дә чыгыш ясады. Мәҗлесне Айваз Садыйров белән Ренат Галиәскәр алып барды. Бу – безнең традиция. Без Ренат белән Айвазныкын алып барган идек. Хәзер Айваз белән Ренатныкын алып барырга әзерләнәбез. Аңа кадәр картаеп бетмәсәк (рәхәтләнеп көлә).
Фото: © Илназ Гариповның шәхси архивыннан
Ренатны кайчан өйләндерәсез соң?
Өйләндерергә инде, шәп егет.
Сезне дә, аны да Илсөя Бәдретдиновага димлиләр иде.
Әйе шул, башта – мине, аннан соң Ренатны димли башладылар. Илсөя – бик якын дустым. Концертлары булуына карамастан, никахка ул да килгән иде. Вакыт тапты: «Братан, мин киләм», – диде.
Ул имеш-мимешләргә көлеп кенә карый идек. Мәрхүм Илфак абый белән эшләгән вакытлар да булды, ничек шулай уйлап була, дип аптырый идем инде мин. Илсөягә дә нәрсә генә язып бетермәделәр. Миңа ул хәтле каты бәрелмәделәр, Илсөягә бәрелделәр. «Шундый яшь егетне, шулай иттереп… Аның бит әле бөтен гомере алда», – дип. Әй көлә идек инде. Илсөя – миңа бертуган апам кебек якын кеше.
Фото: © Илназ Гариповның шәхси архивыннан. Илназның әбисе белән Илсөя Бәдретдинова
Туй уздырачаксызмы?
Никах мәҗлесе шул туй кебек узды бит. Мин – туй белән шаккатыра торган кеше түгел.
Уразага кадәр дип никах укытып калгансыздыр. Уразада өйләнергә ярамый, дигән сүзләргә ышанасыңмы?
Ю-юк, без 7 мартта танышкан идек. Танышу көнен онытмас өчен генә шулай билгеләдек. Мин ырым-шырымнарга ышанмыйм. Ислам ул – бик җиңел дин, халык, юк-бар уйлап чыгарып, үзе катлауландыра аны.
Без 7се дип уйлап йөрдек никахны. Ә 7 март иртән безнең бер корпоратив бар иде. Бәйрәм алды, банкетлар гөрләгән көннәр. Шулай итеп, 7се иртән банкетта эшләп кайттык, көндез минем никах булды, ә кич белән бер туган көн үткәрергә киттек. Безнең компания утлар, шоу-программалы бәйрәмнән үткәрү белән дә шөгыльләнә. Ул көнне башкаларга бәйрәм оештырырга да, үземнең никахны уздырырга да өлгердек.
«Кем инде мин шулкадәр, кеше баласын сынарга?»
Илназ, өйләнергә бер дә ашыкмадың. Эльвинаны сынадыңмы?
Яшьрәк вакытта да өйләнеп була иде. Әмма бер тапкыр гына өйләнәсе килә бит, чынлап та күңелгә яткан кешегә. Эльвинаны, юк, сынамадым. Кем инде мин шулкадәр, кеше баласын сынарга. Аңа болай да бик зур рәхмәт инде, артист халкына шулай ышанып килгәнгә (көлә). Сүзләр күп йөри бит ул. Без, ярар инде, хейтерларга ияләнгән. Инде Эльвинага да «һөҗүм» башланды. Социаль челтәрләргә фотоларыбызны куйдылар да, аның турында шунда ук «ирене ясалган» дип яза башладылар. «Минем иреннәрем ясалмаган бит», – дип шаккатып укыды. Эльвина, гомумән, шоу-бизнес, хейт кебек әйберләрдән ерак тора.
«Кайчан өйләнәсең?» – дип еш сорыйлар идеме? Басымнардан туйган идеңме инде?
Соңгы вакытта, өметләрен өзеп, сорамый башлаганнар иде. Минем өчен гадәти хәлгә әйләнгән иде инде ул. Бездә бит башта: «Кайчан өйләнәсең?» – дип сорыйлар. Аннан соң: «Кайчан бәби алып кайтасыз?» – дигән сорау башлана. Кабат: «Кайчан икенчесенә барасыз инде?» – дип аптырата башлыйлар. «Ике малай янына бер кыз да кирәк инде», «Бер малай да алып кайтыгыз» кебекләре дә киң таралган.
Эльвина белән яшь аермагыз зурмы?
Миңа – 36, аңа – 30, идеаль яшь аермасы.
Кайда яшәргә, кайда төпләнергә уйлыйсыз?
Без Казанда, минем фатирда яшибез. Эльвина бирегә күченеп кайтты, шул ук компаниядә читтән торып эшли. Эшеннән китәсе иде, җибәрмәделәр.
Мәскәүдән соң Эльвинага Казан тар тоелмыймы?
Ул монда яшәп, банкта эшләп киткән. Казан аның өчен чит-ят шәһәр түгел.
Тормыш иптәшең татарча беләме?
Эльвина татарча да, төрекчә дә белә. Балаларыбызга да татарча өйрәтәсе иде. Безнең вазифа – булдыра алган кадәр телебезне, гореф-гадәтләребезне аларга да күчерү.
Кыскасы, «Илназ үз идеалын тапкан» дип, йомгак ясап куябыз бу әңгәмәгә, әйеме?
Шулай дип йомгаклыйк (көлә).
Сез – бик матур пар! Бәхетле булыгыз!