Հայաստանում կձևավորվի երկրորդ առևտրային մուլտիպլեկսորը
Արմինֆո. Հայաստանում կձևավորվի երկրորդ առևտրային մուլտիպլեկսորը: Սեպտեմբերի 14-ին Ազգային ժողովի նիստում համապաատսխան փոփոխություն է կատարվել «Հեռուստատեսության և ռադիոյի մասին՚ օրենքում:
Ինչպես իր ելույթում նշել է տրանսպորտի, կապի և տեղեկատվական տեխնոլոգիաների փոխնախարար Բորիս Դեմիրխանյանը, առաջադրված խնդիրը լուծելու նպատակով կառավարությունն առաջարկել է կարգավորել երեք խմբի հարցեր: Առաջինը վերաբերում է մրցութային փաստաթղթերի ներկայացման դյուրացված տարբերակին: Գործող օրենքում փաստաթղթեր ներկայացնելու համար սահմանված է 3 ամիս ժամկետ, որն առաջարկվում է երկարաձգել մինչև 6 ամիս: Բացի այդ, կկրճատվեն մրցութային փաստաթղթերի ուսումնասիրման ժամկետները` 6-ից մինչև 3 ամիս, ինչը հնարավորություն կընձեռի ավելի օպերատիվ արձագանքել` մրցութային փաստաթղթերի հետ աշխատանքի լավագույն կազմակերպման նպատակով: Հարցերի երկրորդ խումբը վերաբերում է անմիջականորեն այն դեպքերին, երբ մրցույթը ճանաչվում է չկայացած: Խոսքը վերաբերում է այն հայտերին, որոնք չեն համապատասխանում օրենսդրության պահանջներին կամ տեխնիկական բնութագրերին, կամ` հանրային քննարկումների փուլի բացակայության դեպքում: Բացի այդ, հայտամրցույթին մասնակցության պայմաններից մեկն այն դրույթն է, որի համաձայն, հայտ ներկայացնողը պարտավորվում է ծածկել հեռարձակման պահանջվող հաճախությունը: