Մինսկի միջնորդներ. Հայաստանի և Ադրբեջանի նախագահները պատրաստ են վերադառնալ բանակցություններին՝ ղարաբաղյան հակամարտության խաղաղ կարգավորման համար
Արմինֆո.ԵԱՀԿ Մինսկի խմբի համանախագահները տարածաշրջան այցի ավարտին հանդես են եկել Հայաստանի և Ադրբեջանի նախագահներ Սերժ Սարգսյանի ու Իլհամ Ալիևի հետ հանդիպումների արդյունքներն ամփոփող հայտարարությամբ, որում, մասնավորապես, ընդգծել են, որ քննարկումների նպատակը եղել է Հայաստանի և Ադրբեջանի նախագահներ Սերժ Սարգսյանի և Իլհամ Ալիևի հանդիպում կազմակերպելու աշխատանքի արդյունքների ամփոփումը և այդ հանդիպման հնարավոր հարցերի քննարկումը:
Իրենց հայտարարությունում միջնորդները հավաստիացրել են, որ հանդիպումների ընթացքում Հայաստանի և Ադրբեջանի ղեկավարները հաստատել են բանակցությունները վերսկսելու իրենց պատրաստակամությունը՝ ղարաբաղյան հակամարտության խաղաղ կարգավորմանը հասնելու նպատակով: Այնուհետև միջնորդները նշել են, որ երկու պետությունների ղեկավարների առաջիկա հանդիպման մասին տեղեկատվությունը կտարածեն կողմերը` ամենամոտ ապագայում:
Հավելենք, որ ԵԱՀԿ Մինսկի խմբի համանախագահները հոկտեմբերի 6-7-ն այցելել էին տարածաշրջան, որտեղ հանդիպումներ էին անցկացրել Հայաստանի և Ադրբեջանի նախագահների հետ: Մինչ երեք միջնորդների (Ռուսաստան, Ֆրանսիա, ԱՄՆ) այցը տարածաշրջան էր ժամանել ԵԱՀԿ ՄԽ ԱՄՆ նորանշանակ համանախագահ Էնդրյու Շեֆերը, ով եղել էր նաև Արցախում և հանդիպումներ էր անցկացրել հանրապետության ղեկավարության հետ` դրանք գնահատելով արդյունավետ: