«Ելք» խմբակցությունը շրջանառության մեջ է դրել պատգամավորների էթիկայի հանձնաժողով ստեղծելու հարցը
Արմինֆո.Անցած շաբաթ երկու պատգամավորների միջև տեղ ունեցած ընդհարումը շատ տհաճ և անընդունելի է: Այդ մասին այսօր ԱԺ-ում ճեպազրույցի ժամանակ հայտարարել է ՀՅԴ խմբակցության քարտուղար Աղվան Վարդանյանը՝ մեկնաբանելով Ազգային ժողովում Հանրապետական կուսակցությունից պատգամավոր Արտաշես Գեղամյանի և «Ելք» խմբակցության ղեկավար Նիկոլ Փաշինյանի միջև տեղի ունեցած միջադեպը: Վարդանյանը նշել է, որ Ազգային ժողովում պատգամավորները պետք է կոռեկտ պահեն իրենց, իսկ նման պահվածքը դատապարտելի է:
«Ելք» խմբակցության ղեկավար Նիկոլ Փաշինյանն իր հերթին հայտարարել է, որ խմբակցությունը պաշտոնապես շրջանառության մեջ է դրել էթիկայի հանձնաժողով ստեղծելու մասին որոշման նախագիծ, որը կուսումնասիրի նման միջադեպերը: Նա նշել է, որ միջադեպը քաղաքական ենթատեքստ ունի: Բանն այն է, որ կառավարող կուսակցության ներկայացուցիչները մշտապես բանավեճերի ընթացքում պարտվում են «Ելք» խմբակցությանը, և միջադեպը ռևանշի հասնելու փորձ է: «Եթե դա մարտահրավեր է, «Ելք» խմբակցությունն ընդունում է այն»,- ընդգծել է Փաշինյանը: «Դա քաղաքական հարց է, և դրան պետք է քաղաքական լուծում տալ: Բացի այդ, իրավապահ մարմիններին, որպես կանոն, դիմում են տուժածները, իսկ ես ամենևին ինձ տուժած կողմ չեմ զգում»,- նշել է խմբակցության ղեկավարը:
Նա նշել է, որ ՀՀԿ ներկայացուցիչները, ովքեր մշտապես խոսում են քաղաքական կոռեկտության մասին, իրենք այն չեն պահպանում: Թեկուզ այն միջադեպը, երբ Սերժ Սարգսյանն Արտաշես Գեղամյանին «դատարկ դհոլ» անվանեց: «Եվ այդ ամենից հետո նրանք կոռեկտության խորհուրդներ են տալիս մեզ»,- ասել է Փաշինյանը:
ՀՀԿ խմբակցության ղեկավար Վահրամ Բաղդասարյանն իր հերթին նշել է, որ էթիկայի հանձնաժողովի ստեղծումը նույնիսկ օգտակար կլինի: Բացի այդ, նա ընդգծել է, որ կողմերը միանգամայն տարբեր մեկնաբանություններ են անում միջադեպի առնչությամբ, և դժվար է հասկանալ, թե ով է տվյալ իրավիճակում մեղավոր: «Աշխարհում որևէ խորհրդարանա պահովագրված չէ նման միջադեպերից: Սակայն, մեր խնդիրն է՝ նվազագույնի հասցնել նման դեպքերը»,- ասել է Բաղդասարյանը:
Նշենք, որ հոկտեմբերի 5-ին Ազգային ժողովում ընդհարում է տեղի ունեցել Հանրապետական կուսակցությունից պատգամավոր Արտաշես Գեղամյանի և «Ելք» խմբակցության ղեկավար Նիկոլ Փաշինյանի միջև: Միջադեպը տեղի է ունեցել Ազգային ժողովի միջանցքում: Ամեն բան սկսվել է այն բանից, որ «Հայաստանի Հանրապետության և Ռուսաստանի Դաշնության միջեւ ռազմատեխնիկական համագործակցության զարգացման մասին» պայմանագրի շրջանակներում մատակարարվող ռազմական նշանակության արտադրանքի առկայության եւ նպատակային օգտագործման նկատմամբ հսկողության իրականացման կարգի մասինե համաձայնագրի առնչությամբ իր ելույթում Փաշինյանը խիստ քննադատության է ենթարկել համաձայնագիրը և Գեղամյանին, ով եռանդագին պաշտպանել է այդ փաստաթուղթը: Իր ելույթում Փաշինյանը Գեղամյանին անվանել է կոմունիզմի ջատագով և կոչ արել խոսել բացառապես մարքսիզմ-լենինիզմ թեմաների, այլ ոչ թե՝ միջազգային համաձայնագրերի մասին; Իր գործընկերոջ նման հեգնական ելույթից մինչև հոգու խորքը վիրավորված Գեղամյանը որոշել է Փաշինյանի հետ հարաբերությունները պարզել ԱԺ միջանցքում, բռունցքներով հարվածել է նրան՝ պահանջելով այսուհետ չհիշատակել իր անունը ելույթներում: