Սահակյան. Անցած տարվա ադրբեջանական «բլիցկրիգը» խափանվեց, և ագրեսորը ոչ մի նպատակի չհասավ
Արմինֆո. 2016թ. ապրիլյան պատերազմը պարզապես ադրբեջանական կազմավորումների հարձակում չէր, այլ՝ լայնամասշտաբ պատերազմ, որի նպատակը կայծակնային պատերազմի միջոցով ղարաբաղյան պետականության ոչնչացումն էր: Այդ մասին «Ռազմական դիվանագետ» պարբերականի հետ հարցազրույցում հայտարարել է ԼՂՀ նախագահ Բակո Սահակյանը:
«Այդ «բլիցկրիգը» խափանվեց, և ագրեսորը ոչ մի նպատակի չհասավ: Պաշտպանության բանակը հերթական անգամ ցույց տվեց մարտունակության բարձր մակարդակ, իսկ մեր ժողովուրդը՝ աննկուն կամք, անձնազոհություն և բարձր հայրենասիրություն: Բայց դա չի նշանակում, որ մենք թերություններ ու բացթողումներ չենք ունեցել»,- նշել է Սահակյանը: Այս համատեքստում նա ավելացրել է, որ ցանկացած պատերազմ ի հայտ է բերում նման կարգի խնդիրներ:
Միաժամանակ նա ընդգծել է, որ հիմնական խնդիրն այն է, որ պաշտպանական համակարգը մշտապես կատարելագործվի՝ հաշվի առնելով ռազմաքաղաքական իրադրության փոփոխությունը, գիտատեխնիկական առաջընթացի ապահովումը և շատ այլ գործոններ: Մենք հնարավոր ամեն ինչ անում ենք այդ ուղղությամբ՝ կատարելով հետևողական և քրտնաջան աշխատանք»,- ասել է Սահակյանը: