«Ողջունում ենք Ստեփանակերտի հետ Հոնոլուլուի բարեկամական հարաբերություններ հաստատելու մտադրությունը». ԱՀ ԱԳՆ
Արմինֆո. Արցախի ԱԳՆ ողջունում է Ստեփանակերտի հետ Հոնոլուլուի բարեկամական հարաբերություններ հաստատելու մտադրությունը:
«Ողջունում ենք Հոնոլուլուի քաղաքային իշխանությունների մտադրությունը՝ Ստեփանակերտի հետ բարեկամական հարաբերություններ և տարբեր ոլորտներում գործնական կապեր հաստատելու վերաբերյալ։ Երկկողմ կապերի հաստատումը մնում է մեր արտաքին քաղաքական օրակարգի առաջնահերթություններից մեկը: Արցախի իշխանությունները շարունակելու են ջանքերը՝ օտարերկրյա պետությունների հետ ապակենտրոնացված համագործակցության ընդլայնման և տարբեր ոլորտներում համատեղ գործնական ծրագրերի իրականացման ուղղությամբ»,-ասվում է Artsakhpress գործակալությանը ԱՀ արտաքին գործերի նախարարության տեղեկատվության և հասարակայնության հետ կապերի վարչության պետ Արտակ Ներսիսյանի մեկնաբանության մեջ:
Հոնոլուլուն ԱՄՆ Հավայի նահանգի վարչական կենտրոնն է, և ամենախոշոր քաղաքը՝ ավելի քան 350 000 բնակչությամբ։ Դեռևս անցյալ տարվա մարտի 29-ին Հավայի նահանգի Ներկայացուցիչների պալատը Արցախի Հանրապետությունը ճանաչելու մասին բանաձև է ընդունել, իսկ ապրիլի 20-ին մեկ այլ բանաձև է ընդունվել Հոնոլուլու շրջանի և քաղաքի Խորհրդի կողմից, որը սատարում է Արցախի Հանրապետությանն ու նրա իշխանությունների շարունակական ջանքերը՝ երաշխավորելու Արցախի քաղաքացիների իրավունքները։