Զատուլին. Նախագահական լիազորությունների ժամկետի լրանալուց հետո Սերժ Սարգսյանն, ամենայն հավնականությամբ, կզբաղեցնի ՀՀ վարչապետի պաշտոնը
Արմինֆո. Հայաստանի նախագահ Սերժ Սարգսյանը, 2018 թվականի ապրիլին պետության ղեկավարի պաշտոնում իր լիազորությունների ժամկետի լրանալուց հետո, ամենայն հավանականությամբ, կգլխավորի նախարարների կաբինետը: Այդպիսի կարծիք է հայտնել
ՌԴ ԱՊՀ երկրների, Եվրասիական ինտեգրացման և համերկրացիների հետ կապերի գործերով հանձնաժողովի նախագահի առաջին տեղակալ Կոնստանտին Զատուլինը:
«Ես իշխանության ղեկին կրկին տեսնում եմ Սերժ Սարգսյանին, բայց արդեն՝ որպես վարչապետ: Փորձը ցույց տվեց, որ Հայաստանը կարող է ընդունել որոշումներ, որոնք թույլ են տալիս շարունակել ճանապարհն՝ առանց լուրջ ներքին կատակլիզմների»,- հայտարարել է Զատուլինը Մոսկվա-Երևան տեսակամուրջի ընթացքում: Նշենք, որ Հայաստանի՝ կառավարման խորհրդարանական կարգի անցնելուց հետո քննարկվում է վարչապետի պաշտոնում երկու թեկնածուի անուն՝ նախագահ Սերժ Սարգսյանի և նախարարների կաբինետի ղեկավար Կարեն Կարապետյանի: Սարգսյանն իր վերջին հարցազրույցի ժամանակ հավաստիացրել էր, որ Հայաստանի՝ կառավարման խորհրդարանական կարգի անցմանն ուղղված սահմանադրական բարեփոխումների նախագծի ընդունումից հետո վարչապետի պաշտոնը չի զբաղեցնի: Մինչդեռ վերջին ժամանակներս Հանրապետական կուսակցության անդամները մեկը մյուսի հետևից հայտարարում են, որ 2018 թ. ապրիլից հետո երկրի վարչապետի պաշտոնում ամենահարմար թեկնածուն Սերժ Սարգսյանն է, և ոչ ոք այդ պաշտոնում նրան փոխարինել չի կարող: Կարեն Կարապետյան իր հերթին, պատասխանելով 2018 թ. ապրիլից հետո իր ծրագրերի մասին հարցին՝ հայտարարել է, որ հաճույքով կշարունակեր գլխավորել նախարարների կաբինետը: