Արդեն երկրորդ օրն է՝ խորհրդարանում կրքերը չեն հանդարտվում. «Ծառուկյան» դաշինքը» լքել է նիստերի դահլիճը
Արմինֆո.Արդեն երկրորդ օրն է՝ խորհրդարանում կրքերը չեն հանդարտվում:
«Ելք» և «Ծառուկյան» դաշինքներից պատգամավորները չեն կարողանում համակերպվել այն փաստի հետ, որ հակառակ Դատական օրենսգրքում փոփոխություններ և լրացումներ կատարելու մասին օրինագծի քվեարկության անօրինականության վերաբերյալ իրենց հայտարարություններին՝ կառավարող կուսակցությունն ընդունված է համարել փաստաթուղթը:
«Այն, ինչ նախօրեին տեղի ունեցավ խորհրդարանում, արհամարհական վերաբերմունք է օրենքի նկատմամբ, կառավարող մեծամասնությունն իր գործողություններով ջնջոց դարձրեց Սահամանադրությունը»,- ԱԺ ամբիոնից հայտարարել է «Ծառուկյան» դաշինքից ԱԺ պատգամավոր Նաիրա Զոհրաբյանը: Նա նաև դժգոհություն է հայտնել կառավարության աշխատանքից, որը, նրա խոսքով, խորհրդարանական մեծամասնությանը համարելով իրեն կցված ֆայլ, հսկայածավալ նախագծեր բերում և պարտադրում է խորհրդարանին, որպեսզի կարճ ժամկետում կարողանա պրոֆեսիոնալ դիրքորոշում հայտնել: «Ծառուկյան» դաշինքը մտադիր չէ համակարպվել նման իրավիճակին, և մենք չենք մասնակցելու կառավարության ներկայացրած օրինագծերի քվեարկությանը»,- հայտնել է Զոհրաբյանը: «Ծառուկյան» դաշինքը, որպես բողոքի նշան, ցուցադրաբար լքել է նիստերի դահլիճը:
«Ելք» դաշինքի ներկայացուցիչներն իրենց հերթին քննադատել են ԱԺ ղեկավարության և կառավարող մեծամասնության նախօրեի վարքագիծը: Ի հեճուկս կառավարող մեծամասնության՝ «Ելք» խմբակցությունը, տորպեդահարելով խորհրդարանի աշխատանքը, յուրաքանչյուր հարց քննարկելիս 20 րոպե ընդմիջում է վերցրել:
Նախօրեին Դատական օրենսգրքում փոփոխություններ և լրացումներ կատարելու մասին օրինագծի քվեարկության ժամանակ որոշակի տեխնիկական անսարքություններ են տեղի ունեցել, մասնավորապես՝ չի աշխատել հանրապետական պատգամավոր Ռուստամ Մահմուդյան քվերկության համար սարքը, իսկ պատգամավոր Նապոլեոն Ազիզյանը «կողմ» է քվեարկել փաստաթղթին՝ հակառակ իր ներկայացրած «Ծառուկյան» դաշինքի կամքի: Խորհրդարանական ընդդիմությունը՝ ի դեմս «Ելք»-ի, հայտարարել է, որ Ազիզյանը սխալմամբ է քվեարկել, իսկ Մահմուդյանի ձայնը ընդհանրապես չի կարելի ընդունված համարել, քանի որ վերջինիս սարքը չի աշխատել, և անհրաժեշտ է կրկնակի քվեարկություն անցկացնել՝ Մահմուդյանի և Ազիզյանի դիրքորոշումը վերջնականապես ճշտելու նպատակով: Սակայն, խորհրդարանի ղեկավարությունն ընդդիմության փաստարկներն անհիմն է համարել և հայտարարել, որ փաստաթուղթն անցել է՝ օրենքին համապատասխան: Դա հարուցել է «Ելք» և «Ծառուրկյան» դաշինքների քննադատությունը, որոնք, ի նշան բողոքի, լքել են խորհրդարանի նիստերի դահլիճը: