Նախօրեին տեղի ունեցած միջադեպին մասնակից փաստաբանների նկատմամբ կարգապահական վարույթ է հարուցվել
Արմինֆո.ՀՀ փաստաբանների պալատը վճռականորեն դատապարտում է օրենքի ցանկացած խախտում, մամուլի ասուլիսի ժամանակ հայտարարել է ՀՀ փաստաբանների պալատի նախագահ Արա Զոհրաբյանը՝ անդրադառնալով փաստաբան Տիգրան Աթանեսյանի գրասենյակի վրա իր իսկ գործընկերների կողմից հարձակմանը և վերջինիս ծեծի ենթարկմանը:
«Մենք արդեն կարգապահական վարույթ ենք հարուցել բոլոր մեղավորների նկատմամբ: Նրանց մեղքը կորոշի 12 մարդուց բաղկացած Փաստաբանների խորհուրդը, նրանք էլ կընտրեն պատժաչափը՝ նկատողությունից մինչև լիցենզիայից զրկում»,- նշել է Զոհրաբյանը՝ հաշտեցման կոչ անելով կողմերին: Նա նաև հավաստիացրել է, որ միջադեպի մասին իմացել է սոցցանցերից՝ չնայած այն բանին, ար Աթանեսյանը հակառակն է պնդել:
ՀՀ Փաստաբանական դպրոցի տնօրեն Սիմոն Բաբայանը լրագրողներին ներկայացրել է տեղի ունեցածի իր վարկածը: «Որևէ կազմակերպված հարձակում փաստաբան Տիգրան Աթանեսյանի գրասենյակի վրա չի եղել՝ չնայած նրա պնդումներին»,- հավաստիացրել է Բաբայանը:
Ըստ նրա, նախօերին տեղի ունեցած միջադեպի առիթ է հանդիսացել Տիգրան Աթանեսյանի հասցեին փաստաբանններից մեկի գրառումը սոցցանցում, ինչը դուր չի եկել վերջինիս: Բաբայանը որոշել է հաշտեցնել գործընկերներին, սակայն Աթանեսյանի կողմից վիրավորանքների է արժանացել:
«Բնական է, որ ես որոշել եմ բացատրությունների համար գնալ Աթանեսյանի մոտ՝ ինձ հետ վերցնելով մեր գործընկեր Արսեն Հարությունյանին, մեզ են միացել նաև
ՀՀ փաստաբանների պալատի նախագահի խորհրդական Գևորգ Մկրտչյանը, ՀՀ փաստաբանների պալատի նախագահի արտաքին հարաբերությունների գծով խորհրդական Վրեժ Խաչիկյանը»,- բացատրել է Բաբայանը:
Գրասենյակում Բաբայանը բացատրություններ է պահանջել Աթանեսյանից, ինչին ի պատասխան՝ նա կրկին վիրավորել է իրեն և, նրա հավաստմամբ, առաջինը հարվածել, ինչն անպատասխան չի մնացել: «Արդյունքում տեղի է ունեցել ծեծկռտուք, ինչի ընթացքում Արսեն Հարությունյանը դիմածնոտային կոտրվածք է ստացել, և այժմ չի կարողանում խոսել»,- ասել է Բաբայանը:
Նա նաև ընդգծել է, որ ինքն է դիմում ներկայացրել Ոստիկանություն՝ այդ գործը քննչական մարմինների փոխանցելու խնդրանքով: ՀՀ Փաստաբանական դպրոցի տնօրենը հայտարարել է նաև, որ մտադիր չէ միջադեպի պատճառով հրաժարական տալ: Ինչ վերաբերում է Արա Զոհրաբյանի / ՀՀ փաստաբանների պալատի նախագահ/ մեղսակցությանը գործին, նա վճռականորեն հերքել է այդ տեղեկությունները:
ԱրմԻնֆո-ի թղթակցի հետ զրույցում փաստաբան Երվանդ Վարոսյանը հայտարարել է, որ փաստաբաններ Տիգրան Աթանեսյանի և Արմեն Սողոմոնյանի վրա հարձակման պատճառը Փաստաբանների պալատի ղեկավար Արա Զոհրաբյանի անհանդուրժողականությունն է իր հասցեին ցանկացած քննադատության նկատմամբ: Նա չի կարողացել նշել հարձակման հստակ պատճառը, սակայն, նրա կարծիքով, առիթ կարող էր հանդիսանել Facebook-ում քննադատական գրառումը: «Բայց հիմնական շարժառիթն այն է, որ Փաստաբանների պակատի ղեկավար Արա Զոհրաբյանն ընդհանրապես իր հասցեին քննադատություն չի հանդուրժում: Նա դիկտատուրա է հաստատել պալատում, չի հանդուրժում որևէ այլակարծություն, իսկ եթե ինչ-որ մեկը համարձակվում է հակառակվել կամ քննադատել իրեն, հրապարակորեն մատնացույց անել այն փաստը, որ Պալատում սկսել են աշխատել հիմնականում նրա հարազատները և ընկերները, հատուկ նրանց համար թափուր տեղեր են բացվել, արժանանում են նման բախտի: Եվ եթե ավելի վաղ Զոհրաբյանը սահմանափակվում էր միայն «անցանկալի» փաստաբանների հասցեին պատվերով հոդվածներով, հետո անցավ նրանց նկատմամբ վարչական տուգանքների կիրառմանը, այժմ ինքնադատաստանի մեթոդներ է գործի դրել: Եթե այդ ամենը չկանխվի, իրավիճակն էլ ավելի կվատթարանա»,- ընդգծել է Վարոսյանը: