Հայ-թուրքական սահմանի բացումը քաղաքական պարտադրանք է. ԱԺ պատգամավոր
7 տոկոսանոց տնտեսական աճը, ինչպես ակնկալում է Հայաստանի կառավարությունը, բացառված չէ, բայց, ըստ ընդդիմադիր պատգամավոր Արթուր Խաչատրյանի, գործադիրն այդ աճի ապահովման հետ որևէ աղերս չունի:
«Ռուս-ուկրաինական պատերազմի արդյունքում Հայաստանի միջոցով անցնող մարդկանց, բեռների և ֆինանսների մնացուկներն են: Այսինքն, Հայաստանի բանկային համակարգով գումար է շրջանառվում, ինչ-որ մի բան մնում է նաև այստեղ, բացի այդ, Ռուսաստանի ու Եվրոպայի օդային հաղորդակցությունը փակ է, Հայաստանի միջոցով են անցնում»,-ԳԱԼԱ-ի հետ զրույցում նշեց պատգամավորը:
Ռեկորդային աշխատատեղերի մասին են խոսում. նախորդ նման պնդումներին ընդդիմադիրներն արձագանքում էին, որ աշխատատեղերի նման ցուցանիշը ստվերի կրճատման հետևանք է: ԱԺ պատգամավորը հակադարձում է՝ ռեկորդին պետք է հաջորդեր հասարակության բարեկեցության բարձրացումը, ինչն այս պահին տեսանելի չէ. «Ինչ-որ չափով ստվերից դուրս եկած աշխատատեղերն են, նաև մեծամասամաբ պայմանավորված է դրսից եկած աշխատուժով: Այս բյուջեն մանիպուլյացիաների և դեմագոգիայի ամբողջություն է»:
Արցախահայերի ներհոսքը Հայաստան, ըստ պատգամավորի, կարող է միայն դրական ազդեցություն թողնել տնտեսության վրա. «Եթե կառավարությունն ուզենա և կարողանա, ապա մեծ ներհոսքը շատ մեծ դրական ազդեցություն կարող է ունենալ: Մենք ունենք մեծաթիվ բարձրակարգ աշխատուժի ներհոսք, որը հնարավոր է օգտագործել, բայց ես, այնուամենայնիվ, հույս ունեմ, որ մեր հայրենակիցները շատ շուտով կվերադառնան Արցախի հանրապետություն և կվերակերտեն իրենց պետականությունը»:
Ինչ վերաբերում է հայ-թուրքական սահմանի բացմանը, Արթուր Խաչատրյանը համոզված է՝ սա քաղաքական պարտադրանք է Հայաստանին:
The post Հայ-թուրքական սահմանի բացումը քաղաքական պարտադրանք է. ԱԺ պատգամավոր appeared first on ԳԱԼԱ.