Semenağa qarşı ifadeler bergen qabaatlav şaatları «Kadırovnıñ işi» boyunca sorğulandılar
Şaatlardan biri, Qırım FOMS (Mecburiy Tıbbiy Sigorta Fondı – QA) uquq bölüginiñ mudir muavini Denis Barantsev «Kadırovnıñ işi»nde FSB hadimleri tarafıdan tahqiqat areketleriniñ ötkerilmesi esnasında şaat olaraq celp etilgen edi. Jurnalist Nikolay Semenanıñ işinde Barantsev, Qırım.Aqiqat saytında Semenanıñ maqalesini tapqan ve bunı FSBniñ operatif hadimlerine bildirgen qabaatlav şaatı olaraq keçe.
Diger şaat, Molodöjnoye meskün köy yeri memuriyetiniñ rehber muavini Aleksandr Voytseşçuk de «Kadırovnıñ işi» boyunca tahqiqat areketleriniñ ötkerilmesi esnasında celp etilgen şaat olaraq keçe. «Semenanıñ işi»nde Voytseşçuk, jurnalistniñ qamaçav aqqında maqalesini tapıp, mundericesinden çorlanğan ve bundan soñ FSBge muracaat etken qabaatlav şaatı olaraq keçe.
Dekabrniñ 20-sinde mahkemede yapılğan sorğulav esnasında Voytseşçuk ve Barantsev, «Kadırovnıñ işi» boyunca celp etilgen şaatlar olğanları bir tesadüftir, dediler. Aytqanlarına köre, olar (FSBniñ Qırım boyunca idaresi bulunğan – QA) Franko bulvarına iş boyunca keldiler. Anda olarnıñ yanına bir kişi kelip, özüni FSB hadimi olaraq tanıttı ve tahqiqat areketleriniñ ötkerilmesi esnasında şaatlar sıfatında iştirak etmekni teklif etti.
Rusiye telükesizlik hadimleri 2016 senesi oktâbrniñ 5-nde qırımtatar faaliyetçisi Suleyman Kadırovnıñ evine tintüv etmek içün keldiler. Tintüv esnasında evinden noutbuk ve telefon alındı. Tintüv, Radionov soyadlı akem tarafından, Rusiyeniñ sıñırlarını tanımamağa davet ve «Asker» cemiyet birleşmesine qol tutuv sebebi ile şübhe altına bulunğanı içün evni közden keçirilmesine dair alınğan qarar esasında yapılğan edi.
2016 senesi oktâbrniñ 11-nde Suleyman Kadırovğa qarşı «separatizm» şübhesi ile cinaiy iş açıldı. 2017 senesi aprelinde Rusiyeniñ maliye monitoringi boyunca hizmeti Suleyman Kadırovnı ekstremistler ve terroristler cedveline kirsetti.
Azatlıq Radiosı ve Qırım.Aqiqatnıñ muellifi olğan Qırım jurnalisti Nikolay Semena, açıqtan yapılğan Rusiyeniñ topraq bütünligini bozmaq davetinde qabaatlandı.
2017 senesi sentâbrniñ 22-sinde Aqmescitte mahkeme Semenağa qarşı şartlı olaraq 2,5 yılğa azatlıqtan marum etüv ve 3 yıl devamında cemiyet faaliyetlerinde iştirak etmesini yasaq etüv şeklinde ceza tayin etti.
Rusiye tarafından ilhaqından soñ Qırımda mustaqil jurnalistler, cemiyet faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtına alâqası bar dep şübhe altında tutulğan Qırım musulmanlarınıñ evlerinde ketken sayın daa sıq surette tintüvler yapıla.