QMC prokuraturası Qırım Yuqarı Radasınıñ daa eki sabıq deputatını devlet hainligi etkenlerinden şübheli dep saya
Bunı dekabrniñ 20-sinde Qırım Muhtar Cumhuriyeti Prokuraturasınıñ matbuat hizmeti bildire.
Bildirüvde: «Olarnıñ (şübheli deputatlarnıñ – QA) vastasız iştiraki ile qanunsız olaraq bir qaç qarar alındı. Bu qararlarnıñ alınması neticesinde Qırım Muhtar Cumhuriyetiniñ territoriyası Rusiye Federatsiyası terkibine kirip, Qırım territoriyasınıñ işğali başlandı», – denile.
Nezaret muessisesi şübheli olaraq ilân etilgen sabıq deputatlarnıñ adlarını bildirmedi.
Bunıñ arfesinde Qırım Muhtar Cumhuriyeti Prokuraturası, 2017 senesiniñ dekabr ayındaki vaziyetine köre, Qırım Yuqarı Radasınıñ 75 sabıq deputatınıñ qıdırıluvı ilân etildi, dep bildirdi.
Qırım ve Aqyar şeeri territoriyasında 2014 senesi martnıñ 16-sında yarımadanıñ statusı boyunca dünya tarafından tanılmağan referendum ötkerildi. Rusiye, onıñ neticesine esaslanıp, Qırımnı öz toprağına qoştı. Ne Ukraina, ne Avropa Birligi, ne de AQŞ referendumdaki rey berüvniñ neticelerini tanımadılar. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtları Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar qullandı. Rusiye, yarımadanı işğal etkenini red etip, oña «tarihiy adaletniñ tiklenmesi», dey.Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.