«Veciye Kaşka işi» figurantı Çapuh Qırım muvaqqat izolâtorında açlıq ilân etti
Neşir bildirgen kibi, imayesi altında bulunğannı muvaqqat izolâtorda ziyaret etken advokat, Çapuhta «bedenniñ sağ tarafı zornen areket ete, o, yalıñız kamerada beraber bulunğan mabüslerniñ yardımınen yüre bile». Muvaqqat izolâtorda yalıñız soylar tarafından ketirilgen ilâclar vastasınen tıbbiy yardım kösterile. Muvaqqat izolâtornıñ tıbbiyet bölügi mudiri Yevgeniy Anikanov daa evel, çarşenbe künü, onıñ qolunda Çapuhnıñ hastahanege yollanması aqqında buyruq bar, lâkin üç kün devamında bu buyruq eda etilmedi.
Azatlıq Radiosınıñ muhbiri, mabüs, narazılıq kösterip, dekabrniñ 20-sinden başlap aş aşamaqtan vazgeçe, dep bildire.
Qırımtatar areketiniñ faaliyetçisi Zair Smedlâyevniñ bunıñ arfesinde bildirgenine köre, qırımtatar faaliyetçisi, «Veciye Kaşka işi» figurantı Asan Çapuh insult keçirgen soñ sağlığınıñ vaziyeti pek ağır oldı.
65 yaşlı Asan Çapuh muvaqqat izolâtorda mikroinsult keçirdi ve acele surette hastahanege yatqızılmaq kerek. Onıñ advokatı Ayder Azamatov, imayesi altında bulunğannıñ şeer hastahanesine keçirilmesini talap ete edi.
Noyabrniñ 23-nde kündüz Aqmescitte telükesizlik hadimleri bir grup qırımtatarlar – Kâzim Ametov, Asan Çapuh, Ruslan Trubaç ve Bekir Degermencini yaqaladılar. Olar Türkiye vatandaşından «aqsız yerde hususan büyük miqdarda para talap etüv»de qabaatlanalar. Rusiye telükesizlik hadimleri tarafından yaqalanuvları esnasında qırımtatar milliy areketiniñ veteranı Veciye Kaşka yaramadı. Daa soñra qadınnıñ vefat etkeni belli oldı.
Noyabrniñ 24-nde Rusiyeniñ kontroli altında bulunğan Aqmescitteki Kyiv rayonı mahkemesi yaqalanğan qırımtatar faaliyetçilerini 2018 senesi yanvarniñ 15-ne qadar apiste qaldırdı.