Çubarov, Beyazrusiyeniñ BMTde rey berüvi sebebi ile Minskteki muzakereler meydançığından vazgeçmekni teklif ete
Bunı o, dekabrniñ 20-sindeki oturışuvda Yuqarı Radanıñ minberinden çıqış yapqanda söyledi.
O: «Biz, işğalci devlet olğan Rusiye etrafında birleşken ve (BMT Baş Assambleyasında reyge qoyulğan – QA) qararğa qarşı ses berip, yüzüni qarartqan Beyazrusiye Cumhuriyeti, Ermenistan, Qazahıstan, Qırğızıstan, Özbekistan ve Tacikistan ile munasebetlerimizni hususiy bir diqqatnen ğayrıdan közden keçirmek kerekmiz», – dep qayd etti.
Onıñ aytqanına köre, Ukraina akimiyeti, «Ukrainanıñ topraq bütünligini temin etüv ve Rusiye tecavuzını toqtatuv boyunca muzakereler ötkermek içün yañı bir devlet teklif etmek kerek».
Daa evel Ukraina Yuqarı Radasınıñ reis muavini İrına Heraşçenko Beyazrusiye tarafından BMTniñ Qırımda insan aqları boyunca vaziyeti aqqında qararına qarşı rey berilmesine «sayğısız areket» dedi.
Beyazrusiye tarafından açıq menbalarda bu hususta izaat berilmedi.
Dekabrniñ 19-nda BMT Baş Assambleyası «Qırım Muhtar Cumhuriyeti ve Aqyar şeerinde (Ukraina) insan aqları saasında vaziyet» serlevalı qararnı soñ şekilde qabul etti.
Rey berüv neticesinde 70 ülke vesiqanıñ qabul etilmesine ses berdi, 26 ülke qarşı çıqtı ve 76 ülke rey berüvde iştirak etüvden vazgeçti. Ermenistan, Beyazrusiye, Rusiye, Suriye, Zimbabve ve diger ülkeler bu qararğa qarşı rey berdiler.
Vesiqada Rusiyeden, BMT Halqara mahkemesiniñ Qırımda Qırımtatar Milliy Meclisiniñ yasaq etilmesini lâğu etüv ve yarımadada ukrain ve qırımtatar tillerinde tasil alınmasını temin etüv boyunca tevsiyelerindeki muvaqqat tedbirlerniñ amelge keçirilmesi talap etile.
Ukraina Tış işleri nazirligi BMT Baş Assambleyası tarafından Qırımda insan aqlarınıñ bozuluvı aqqında yañartılğan qararnıñ qabul etilmesini selâmlay ve bundan söñki adım, yarımadanıñ işğalden azat etilmesi olmalı, dep bildire.
Halqara teşkilâtları Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar qullandı. Rusiye, yarımadanı işğal etkenini red etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.