Umerov: Qırımtatar halqı öz aqları içün küreşte ketken sayın daa yañı usullar tapa
O: «Büyüklerniñ izinden genç faaliyetçiler basıp kele. Bir kişilik piket içün cöreme ve 10 künlük apis ile cezalanğan 76 yaşlı Server Karametovnıñ talaplarını devam ettirip, bütün Qırım boyunca on ve ondan soñ yüz kişi bir kişilik piketlerge çıqtı. Halq, cöremelerni tölemek içün 10 rublelik maden aqçalarnı toplav boyunca «Qırım marafonı» tedbirini teşkil etti. Tedbir şimdi de devam ete. Babasız qalğan siyasiy mabüslerniñ yüz balası da diqqatsız qalmadı», – dep yazdı.
Onıñ aytqanına köre, repressiyalarğa baqmadan, küreş devam ete: «Dünya ilhaqnı tanımay. RFke siyasiy ve iqtisadiy tazyıq arta. Sanktsiyalarnıñ arttırılmasına dair qararlar alına. Dekabrde BMT Baş Assambleyası «Qırım Muhtar Cumhuriyeti ve Aqyar şeerinde (Ukraina) insan aqları saasında vaziyet» boyunca pek sert bir qarar qabul etti. Mutehassıslarnıñ, Qırım statusını territorial muhtariyetten milliy muhtariyetke deñiştirmek içün Ukraina Anayasasına kirsetilecek deñişmeler üstündeki işi soñuna yetmek üzredir».
Qırım ilhaq etilgen soñ Rusiye FSBsi yarımadada qırımtatarlar, musulmanlarnıñ evlerinde tintüvler yapmağa başladı. Neticede al-azırda 100-den ziyade bala, Rusiye telükesizlik hadimleri tarafından türlü qabaatlavlar boyunca yaqalanğan babalarından ayırıldı. Bu balalarğa Qırımdaki «Bizim balalar» hayriye fondu yardım ete. Ukrainanıñ qıtadaki qısmında «Qırım ailesi» teşkilâtı Qırım siyasiy mabüsleriniñ balalarına qol tutuv tedbirlerini ötkere.