Rusiyede apiske alınğan Baluh baş ve köküs qafesi ağrıları aqqında bildirdi
«Tünevin onı oquv-profilaktika müessisesinde ziyaret etip oldım. Biraz özüne keldi, şişikligi keçti. Amma ne tedaviylev, ne de diagnoz alâ daa qoyulmadı. Oña yürek ilâcı ve tınçlandırıcı ilâclar berile. Başqa ilâc yoq. Baş ağrısı ve sol tarafta köküs qafesinde ağrı olğanını ayta», – dep tarif etti Dinze.
Onıñ aytqanına köre, Baluh Rusiye koloniyasınıñ aşlarını aşamay.
«Niayet, ceza izolâtorına qapatılmazdan evel yollanılğan şeylerni aldı. Mahsullarnıñ bir qısmı bozuldı, amma oña yete. Aş şimdilik bar. Koloniyada aşamay», – dep bildirdi advokat Dinze.
Daa evel Volodımır Baluhnıñ apishane hastahanesine avuştırılğanını Qırım.Aqiqatqa Tver vilâyetiniñ insan aqları vekâletlisiniñ apparatı bildirgen edi.
Baluh Tver vilâyetindeki koloniyanıñ ceza izolâtorına avuştırılğan edi, daa soñra ceza izolâtorında qaluv müddeti mayısnıñ soñuna qadar uzatılğan edi.
Ukraina Yuqarı Radasınıñ insan aqları vekâletlisi Lüdmila Denisova Rusiyeniñ Tver koloniyasınıñ memuriyeti Ukraina konsulına Baluhnen körüşmege izin bermedi, dep bildirdi.
Volodımır Baluh – tamırlı qırımlı, çiftçi, ukrainalı cemaat faali, Ukrain milletçileri kongressiniñ azası. Rusiye Qırımnı ilhaq etken soñ Rusiye vatandaşlığından vazgeçti. 2013 senesi qışta evinde Ukraina bayrağını astı, daa soñra «Sema Yüzü qaramanları soqağı» levhasını tikledi.
2016 senesiniñ soñunda Volodımır Baluhnı Rusiye FSBsiniñ hadimleri tutıp aldı. Olar Baluh yaşağan evniñ çardaqında 90 patron ve bir qaç trotil taş tapılğanını bildirgen edi. Rusiye kontrolindeki Qırım mahkemesi onı 5 yılğa azatlıqtan marum etti – eki cinaiy dava boyunca: silâ saqlaması ve «Aqşeyh vaqtınca tutuv izolâtorınıñ yolbaşçısını köteklev» dep adlandırılğan adise.
Baluh qabaatını tanımayıp, açlıqqa başlağan edi. Baluhnıñ imayesi ve aq qorçalayıcıları onıñ Ukrainağa qoltutqanı içün repressiyalarnıñ qurbanı oldı, dep tüşüneler. «Memorial» aq qorçalayıcı merkezi Volodımır Baluhnı siyasiy mabüs olaraq tanıdı.