Klimkin, Rusiyeden Qırımda tintüvlerden soñ tutulğanlarnı azat etmesini talap ete
«İşğal altındaki Qırımda yañı tutuvlar dalğası – 8 qırımtatarı nezaret altına alındı. Rusiye Federatsiyası repressiyalarnı gizlemek içün «qırımtatarı» ve «terrorist» ıstılaları arasında musaviylik işaretini qoya. Qırımtatarlarnıñ tez vaqıtta azat etilüvini talap etemiz. Bunıñ içün halqara ortaqlarımıznen çalışamız. Qırım – Ukrainadır», – dep aytıla haberde.
Ukraina Yuqarı Radasınıñ insan aqları vekâletlisi Lüdmila Denisova Rusiye zenaatdaşı Tatyana Moskalkovağa muracaat etip, tutulğan qırımtatarlarnıñ aqlarını temin etüvde yardımcı olmasını ve bulunğan yerleri aqqında malümat bermesini rica etti.
İyünniñ 10-nda Rusiye kontrolindeki Aqmescitniñ Kiyev rayon mahkemesi qırımtatarı Riza Ömerovnı 1 ay ve 26 künge, avgustnıñ 5-ne qadar, SİZOda qaldırdı. Daa soñra mahkeme iyünniñ 10-nda tutulğan daa üç qırımtatarını avgustnıñ 5-ne qadar SİZOğa yolladı: Enver Ömerov, Eskender Suleymanov ve Ayder Cepparovnı.
İyünniñ 10-nda tutulğan daa dört qırımtatarı – Lenur Halilov, Ruslan Mesutov, Eldar Kantimirov ve Ruslan Nagayevniñ – sıñırlav tedbiri iyünniñ 11-nde Aqmescitniñ Kiyev rayon mahkemesinde belgilenecek.
Haber etilgeni kibi, iyünniñ 10-nda saba Aluşta, Qarasuvbazar ve Aqmescit rayonlarında qırımtatarlarnıñ evlerinde keçirilgen tintüvlerden soñ 8 er adam tutuldı.
Rusiye FSBsi tahqiqat tedbirleri 205.5 maddesi (terror teşkilâtınıñ faaliyetini teşkil etüv ya da iştirak etüv) boyunca cinaiy dava çerçivesinde keçirile ve «Hizb ut-Tahrir» teşkilâtınen bağlı, dep bildirdi.
Ukraina uquq qoruyıcı organları Qırımda Rusiye quvetçileri keçirgen tintüvlerden sebep cinaiy tahqiqat başlattı.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kurbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.