Qırımda hırsızlanğan Ervin İbragimov 34 yaşını toldurdı, içtimaiy ağlarda doğğan kününde fleşmob başlatıldı
Ervin İbragimovnıñ doğğan künü munasebetinen içtimaiy ağlarda fleşmob başlatıldı. Qırımtatar faali Nariman Celâl Facebooktaki saifesinde fleşmobqa qoşulmağa davet etti.
«Fleşmobqa qoşulmağa teklif etemiz: o qadar bayramlıq da degil, daa çoq müim, Ervinniñ tuvğanları destegimizni is etmeli. İçtimaiy ağlarda oña ve tuvğanlarına tilekler yazıp, heşteg qoşuñız: # Den_narocennâ_Ervіna, #Ervinniñ_doğğan_künü, #where_is_Ervin. Ervin, seni bekleymiz», – dep yazdı Celâl.
Ervin İbragimov hırsızlanğan soñ Kyivde Rusiyeniñ Ukraina elçihanesi ögünde «Ervin qayda?» muntazam aktsiyaları keçirile.
Bağçasarayda 2016 senesi mayısnıñ 24-nde Dünya qırımtatar kongressi icra komitetiniñ azası, Bağçasaray şeer şurasınıñ sabıq deputatı Ervin İbragimov hırsızlanğan edi. Maşinası orta yolda tapıldı.
Qırımtatar faali Nariman Celâl tutulğanını video nezareti kameraları qayd etti, dep bildirdi. Video uquq qoruyıcı organlarına berildi.
Ğayıp olğan insannıñ babası yarımadanıñ Rusiye prokuraturasına ariza berip, oğlunı qıdırmağa rica etti.
Qırım Muhtar Cumhuriyetiniñ prokuraturası Ervin İbragimovnıñ ğayıp olmasınen bağlı mahkemeden evel tahqiqat keçirmekte.
Qırım ilhaqından soñ yarımadada insanlar, hususan qırımtatarlar, sıq-sıq qaçırılmağa başladı. Rusiye Taqiqat komitetiniñ Qırım idaresi, «yarımadada qırımtatarlarnıñ kütleviy ğayıp olması» qayd etilmey, dep israr ete.